O Forum Carballo servirá de sede da Xunta en Bergantiños
As dependencias da Xunta no municipio carballés trasladaranse ao complexo Fórum Carballo a partir de xaneiro de 2014 tralo convenio asinado onte entre a Consellería de Presidencia e o Concello de Carballo. Un xeito de darlle máis vida a este espazo multidisclinar, que podería esmorecer por falta de uso.
O obxectivo do convenio é centralizar neste edificio todos os servizos autonómicos localizados no termo municipal, a fin de prestar un mellor e máis áxil servizo á cidadanía, ademais de optimizar o uso dos edificios públicos.
Así, está previsto que as dependencias da Oficina de Emprego (da Consellería de Traballo e Benestar), das oficinas das consellerías de Medio Rural e Mar (Oficina Agraria Comarcal) e de Medio Ambiente, Territorio e Infraestruturas (neste último caso con seis persoas do distrito ambiental II do Servizo de Conservación da Natureza) estean plenamente operativas e dispoñibles para os veciños e veciñas a partir do mes de xaneiro na planta baixa e no andar 1 da nave 2 do Fórum.
