Esta xente non falla nunca. Evento que arma, cheo ao canto. Onte mércores, de novo co salón de actos do Concello de Carnota ateigado de xente, daba comezo o festival de Nadal da Escola Municipal de Música.

E iso que levan un inicio de curso algo movido. O equipo de mestres cóntannos que este trimestre foi un pouco raro e moi rápido, xa que contan cunha mestra nova de Iniciación Musical, e que tivo que ter o seu período de adaptación, pero que a estas alturas tanto Pilar (que así se chama) coma os rapaces/as xa están totalmente en conexión. Tamén nos din que o mes de outubro foi moi convulso, xa que Alianza (a directora) estivo de baixa, e os alumnos de piano estaban un pouco sesgados cos outros mestres, pero que chegado novembro xa todo voltou á normalidade. Polo tanto, dous meses de normalidade que tampouco dan para preparar todo ao “dedillo” como a eles lles gusta facer.

Pero o Festival sempre serve para unificar Carnota. Foi un festival moi bonito, cóntannos, de solistas, onde se viron desfilar a músicos de moitas especialidades distintas, con varios estilos e de moi diversas idades.

Empezou o programa, presentado por dous alumnos/as de 6º de Linguaxe Musical, Fran e Lucía, unha nena pianista cunha coñecida panxoliña, e a partires de aí, pasarela de instrumentistas (guitarras, saxofóns, clarinetes, acordeóns, gaitas, etc) e de actuacións grupais coma os Combos de música moderna, a Coral Polifónica da Escola, as Pandereteiras da Solaina, o Coro Infantil ou a Orquestra Orff.

Unha festa da música e desta gran familia que conforma a Escola Municipal de Música de Carnota.

Aquí vos deixamos cun anaco da canción do Caneco, con Moncho Domínguez e os alumnos de Gaita, Fran, Lucía e Uxía.

E aquí, a actuación da Coral Polifónica da Esmu de Carnota:

Novas relacionadas

• A Escola de Música volve encher o Salón de Plenos de Carnota

Fonte

• Redacción de QPC (info@quepasanacosta.gal).