O pobo de Lariño quere salvar o seu Faro

12:54 02/09/14

Son eses espazos tan emblemáticos que están esmorecendo co paso dos anos e da tecnoloxía. Xa ninguén entra, a ninguén lle importa que acontece aló dentro. 100 anos alumeando, facendo de guía para milleiros de barcos, e hoxendía non ten visitantes.

Unha situación que se repite por ducias de Faros de todo o litoral galego. E se ben temos algunha boa experiencia, como cos empresarios de Camariñas e o Faro Vilán, a meirande parte morre de humidade. Agás en Lariño, onde o pobo, da man da Asociación de Veciños Insua de Lariño están armando unha revolución para devolverlle a vida.

Están iniciando a campaña Salvemos Lariño, reclamando o arranxo do Faro de Punta Insua para frenar o seu grave deterioro. Un símbolo do Concello de Carnota está en perigo e, quen se non, o pobo, salta na súa defensa. “Un patrimonio común, vencello de mar e terra, negado ao seu pobo para a súa posta en valor e aproveitamento”, apuntan.

Hotel ou Eco-Centro

Un aro salvavidas para a campaña Salvemos o Faro de Lariño

E teñen solucións. Por exemplo, conscientes da iniciativa do Ministerio de Fomento de destinalos faros como establecementos hosteleiros, desde a asociación de veciños non se vería con malos ollos, xa que o consideramos como un importante proxecto dinamizador da economía do Concello, onde non existe precisamente unha gran oferta hosteleira.

Pero de non existir interese no sector privado para súa reconversión en hotel e antes de ver como ano tras ano se vai deteriorando cada vez máis un dos edificios máis emblemáticos do concello é polo que veñen de facerlle chegar a Autoridade Portuaria de Vilagacía unha proposta dos veciños de Lariño, có apoio do Concello de Carnota para a creación cun ECO-CENTRO nas referidas instalacións.

Xa no ano 2012 o alcalde de Carnota, Ramón Noceda, solicitou á Autoridade Portuaria de Vilagarcía (que é quen ten a competencia desta instalación) a cesión do faro ante o seu evidente estado de deterioro, coa finalidade de restauralo e destinalo a Eco-Centro. Porén este proxecto foi rexeitado co único argumento de que "as autoridades estaban a estudar que facer cos faros”.

A campaña

A campaña, que leva unhas semanas en marcha, consiste nunha recollida de sinaturas esixíndolle á Autoridade Portuaria de Vilagarcía que acceda ceder o Faro de Punta Insua ao Concello de Carnota con finalidade de ocupación, rematando asi dunha vez co despropósito de que sexa un dos poucos faros galegos de acceso absolutamente prohibido a veciños e visitantes, non só ás súas instalacións senón incluso ás súas inmediacións.

A campaña xa conta cunha páxina web propia (salvemosofaro.blogspot.com), e tamén está en Facebook Salvemos Lariño, onde xa sumou máis de 400 apoios en poucas semanas. Ademais, esta fin de semana a reivindicación saiu ás rúas de Lariño cun mural reivindicativo realizado no Campo de Fútbol sito no entorno, e coa instalación dun aro salvavidas no portalón que desde hai anos restrinxe o acceso de calquera visitante. Asi mesmo, esta semana pendurarase nas inmediacións da estrada comarcal unha pancarta reivindicativa, e a corporación municipal de Carnota debatirá no seu vindeiro pleno a petición dos veciños unha moción en apoio da iniciativa. Tamén hai previstas unha xornada de portas abertas no Faro e varias accións de voluntariado de limpeza do entorno, cuxos datos iremos comunicando segundo se vaian ultimando máis detalles.

Unha BTT Solidaria

Xa están armando unha BTT Solidaria a celebrar en Lariño para o vindeiro 28 de setembro. Xa saben, por unha boa causa. Teñen máis información en bttsolidario.galitiming.com.