Juan Domingo Fernández Blanco é de Carnota, e ten 44 anos pero unhas gañas de seguir aprendendo xigantes. Por iso, a pesar da súa diversidade funcional está estudiando 3º da ESA, a educación de adultos que se imparte no IES Fernando Blanco de Cee.

Ata aquí todo correcto. O problema chega cando as súas posibilidades de aprender menguan por mor da crise. Juan Domingo non esixe máis que os apoios recoñecidos ás persoas con diversidade funcional para poder manter o ritmo dos seus compañeiros. Pero, segundo denuncia, os recortes estanlle quitando esa posibilidade e por agora segue sen un profesor de apoio e sen un ordenador portátil, dúas ferramentas que poderían abrirlle moitas portas.

”Os que pagamos a crise somos os máis débiles”, valora Juan Domingo, que nos sinala que xa tivo unha reunión coa Inspección e mesmo co delegado provincial en materia de Educación, Indalecio Cabana, pero que as promesas e as boas palabras que lle dixo, quedaron, por agora, en nada.

En todo caso, dende o Instituto ceense xa fixeron todo o posible para que Juan Domingo teña un pouco máis de apoio. De feito, son 3 os alumnos con diversidade funcional no centro e os outros dous xa están na segunda fase de aprendizaxe asistido. I é que Juan Domingo non presentou as instancias oficiais para seguir o procedemento legal, e ademais non puido asistir ás clases de reforzo que lle ofreceu o Instituto, e que darían paso, sempre que se aproveiten, á segunda fase, a fase de adaptación curricular, na que se atopan os outros dous compañeiros con diversidade.
"Nós estaríamos encantados de que todos aos alumnos tiveran un portátil, e nós estamos facendo todo o posible para que os alumnos con diversidade funcional teñan máis axuda. Por iso estamos facendo o posible para que Juan Domingo, para o ano, siga os procedementos legais e oficiais para recibir a atención necesaria", sinalan dende o Fernando Blanco.

Segue pois Juan Domingo buscando os seus dereitos, e estes días sacou unha campaña de colleita de sinaturas online para intentar que dende a Xunta escoiten as súas xustas peticións. Necesita a túa axuda para seguir rompendo barreiras, para abrir as súas portas.

Asina por unha educación inclusiva: Change.org.

Fonte

• Redacción de QPC ([email protected]).