Francisco J. Blanco García, nomeado o pasado ano Fillo Predilecto de Cee, é un dos investigadores da Universidade da Coruña que recibirán unha Medallas de Investigación por parte da Real Academia Galega. Blanco García (Cee, 9163), que está a usar a Intelixencia Artificial para mellorar o diagnóstico e tratamento das doenzas reumáticas, recibirá a medalla Ángeles Alvariño González da sección de Bioloxía e Ciencias da Saúde da RAGC.

“Para min é unha honra inmensa, un recoñecemento a unha traxectoria persoal e, sobre todo, ao traballo do meu grupo de investigación GIR-S, formado por un gran número de excelentes investigadores, compañeiros reumatólogos e pacientes que compartiron comigo esta aventura científica. Esta Medalla reforza o modelo de investigación construído en torno ao triángulo UDC-INIBIC-CHUAC, que xa demostrou ofrecer excelentes resultados na xeración de coñecemento e na súa aplicación clínica” -manifesta o investigador-.

É unha figura distinguida na Medicina española e referente internacional no campo da Reumatoloxía, catedrático de Reumatoloxía da Universidade da Coruña, xefe da Sección de Reumatoloxía Clínica e Traslacional no CHUAC. Lidera o Grupo de Investigación en Reumatoloxía, con máis de 10 millóns de euros captados nos últimos 5 anos. Está a impulsar a aplicación de tecnoloxías computacionais avanzadas relacionadas co Big Data e a IA para personalizar o diagnóstico e o tratamento das doenzas reumáticas, anticipándose á súa progresión e optimizando as posibles intervencións terapéuticas. É investigador principal de máis de 100 proxectos de investigación clínica en enfermidades reumáticas, coautor de 8 patentes e de máis de 1.000 publicacións científicas, membro do comité directivo da Sociedade Mundial de Investigación en Osteoartrite, experto da Axencia Española de Medicamentos e experto na Área de Enfermidades Reumáticas na Axencia Europea de Medicamentos. En 2017 foi recoñecido como o mellor investigador mundial en osteoartrite, sendo o primeiro e único español e o quinto europeo en recibilo.

Outros galardóns

Xunto a el tamén serán recoñecidas Laura Carballo (Marín, 1971), que traballa por mellorar as condicións dos traballadores do mar e que levará a medalla Domingo García-Sabel Rivas; Juan María Pou Saracho (A Guarda, 1963), que recibirá a medalla Isidro Parga Pondal da sección de Ciencias Técnicas, polo seu traballo na aplicación do láser na industria, a saúde e a sostibilidade; Nieves Rodríguez Brisaboa (A Coruña, 1957), experta no procesamento de grandes volumes de datos, recibirá a medalla Enrique Vidal Abascal, da sección de Matemáticas, Física e Ciencias da Computación; e Mª Carmen Veiga Barbazán (Brión, 1959), recoñecida coa medalla Antonio Casares Rodríguez da sección de Química e Xeoloxía. polo se traballo de recuperación das das augas residuais compostos de alto valor comercial como bioplásticos ou biocombustibles.