10 concellos da Costa da Morte contarán con servizo de normalización lingüística gracias á Deputación
Só 47 concellos da provincia presentaron a súa candidatura á liña de axudas destinada á creación, mantemento e reforzo dos servizos de normalización lingüística. Entre elas, 6 das propostas son de concellos da Costa da Morte. Muros, Ponteceso e Santa Comba contarán co seu propio axente normalizador, mentres que os concellos de Carnota e Mazaricos, Dumbría e Muxía, e Fisterra e Corcubión, compartirán o seu.
A través da convocatoria, dirixida a concellos de máis de 5.000 habitantes ou mancomunidades, a Deputación da Coruña financia con 12.000 euros as retribucións do persoal técnico dos Servizos de Normalización Lingüística dos concellos.
Entre as funcións dos Servizos de Normalización Lingüística recóllense asesorar á administración na procura do incremento do uso e prestixio da lingua, velar polo cumprimento da lexislación, emitir informes para incorporar accións normalizadoras, fomentar o uso do galego no conxunto da sociedade ou propoñer programas dinamizadores, entre outras.
