O Centro Galego de Bruxelas bota o peche
Hai un ano xa avanzábamos a morte anunciada de varios Centros de Galegos en Europa. E esta fin de semana temos que dar unha mala noticia para a historia da emigración galega en Bélxica, concretamente en Bruselas. Durante 40 anos o Centro Galego La Tentation abriu as súas portas para acoller todo tipo de actividades e como punto de encontro social e cultural da Sociedade galega, española e belga.
Lamentablemente, esas portas non se volverán a abrir…A súa xunta directiva emitía este comunicado para despedirse:
Queridos socios, queridos amigos, querido público:
O Centro Galego de Bruxelas ASBL, fundouse hai 40 anos na localidade belga de Saint-Gilles para que a comunidade galega e a española tivesen un punto de encontro e fraternidade o que foi posible grazas á cesión dos locais do antigo comedor escolar que o concello cedeu á entidade. O local transformouse nunha sala de festas, nun restaurante galego, na discoteca « A Gaiola » e en salas de reunión e ensaios co fin de perpetuar o folclore e a tradición, nun referente onde poder reunirse, compartir historias, o idioma e, como non, poder atopar un pouco da terra natal no país receptor.
Cos anos, as actividades do Centro Galego foron crecendo do mesmo xeito que o número de socios federados e o público que se foi integrando neste tipo de actividades. O grupo folclórico « Galicia Baila » gañou numerosos premios e medallas; « Queimadas » e concertos de música do mundo, concursos “ Miss e Míster A Gaiola ”, festas da amizade, club de fútbol, cursos de danza e música regulares foron algunhas das moitas actividades realizadas.
En 1995, o presidente fundador da nosa asociación, Miguel Palomo López, que tamén dirixía unha empresa especializada en construción e reformas, foi chamado pola cidade de Bruxelas para pechar as portas dun lugar completamente abandonado tras sufrir un incendio e situado no centro da cidade, concretamente na 28 Rue de Laeken. Foi un amor a primeira vista para o noso fundador quen, cegamente, propúxolle unha oferta arriscada ao propietario do edificio; renovar o inmoble pola súa propia conta a cambio de longo contrato enfitéutico de 30 anos. Despois de apróximadamente dous anos de traballo incansable por parte de moitos membros voluntarios da nosa asociación, inaugurouse A Tentation.
Pasaron vinte e dous anos desde que se instalou o Centro Galego de Bruxelas na Tentation. En lugar da famosa tenda de teas "Á Tentation", inaugurouse en novembro de 1997 un novo centro cultural, situado nunha rúa moi pouco e mal frecuentada por entón.
As actividades que a asociación estivo organizando desde entón permitiron que o barrio cambie a súa atmosfera, reducindo a criminalidade cara a Yser. Renováronse varios centros culturais e teatros próximos, volveron abrir baixos comerciais tanto na Avenida Antoine Dansaert como na Rue de Laeken. Cos anos, as actividades culturais propostas pola Tentation multiplicáronse e aberto a todas as culturas, permitindo que todas as comunidades e todos os cidadáns belgas, independentemente da súa orixe, atopen o seu lugar na capital.
máis de 20 anos, A Tentation abriu as súas portas á música e os bailes do mundo, dando a benvida a máis de 1.000 persoas cada semana a través das súas numerosas actividades organizadas durante todo o ano no corazón de Bruxelas: clases de baile e de música cada semana, festas, concertos, exposicións, bailes, festas, festas de empresa, vodas, festivais, conferencias, reunións, debates, ... Son máis de 50.000 subscritores que participan nunha media de 300 actividades anuais para o maior pracer dos cidadáns en Bruxelas.
Ao de hoxe, a nosa asociación atópase nun canellón sen saída despois de experimentar varias dificultades nos últimos anos.
Despois dos ataques terroristas en París en novembro de 2015, houbo un mes de peche obrigatorio para o noso establecemento durante o lock- out en Bruxelas, xusto antes da tempada do Nadal, deixando o mesmo día que os ataques, a uns noivos recentemente casados na Grand Place diante dunha porta pechada. Logo, os ataques en Bruxelas en marzo de 2016, causaron a cancelación de varios eventos, a redución do público que participa nas nosas actividades regulares e, con iso, a caída da asistencia dos nosos socios por temor a novos ataques no centro. A instalación da zona peonil e a inaccesibilidade do centro da cidade en automóbil definitivamente convenceu ao público de non moverse para participar nas nosas actividades pero tamén reduciu o número de reservas para a organización de eventos privados tanto locais como internacionais. Todos estes desafortunados acontecementos obrigáronnos a reducir o noso equipo de traballo. Un total de 6 persoas foron despedidas nos últimos 2 anos, mantendo tan só a dous empregados a xornada completa.
En decembro de 2017, decatámonos de que uns novos veciños instaláronse nun edificio que comparte o noso muro común. Desde entón, presionáronnos e participamos en varias reunións de mediación a través do concello de Bruxelas co fin de atopar unha solución a longo prazo para evitar as molestias causadas polo ruído das nosas actividades habituais e manter a nosa licenza de difusión de música entregada polo IBGE e a cidade de Bruxelas. Redución do número de actividades e redución das horas de peche, diminución do volume, rexeitamento da organización de actividades nocturnas, recolocación de eventos, ...
Realizouse un estudo a ambas as partes do muro, e acábannos de informar de que debemos realizar obras colosais para illar adecuadamente os nosos locais, sen ter certificación ningunha de que estes sexan eficaces ao cento por cento. Estas obras serán imposibles de financiar para a nosa estrutura, que hoxe coñece unha situación financeira insustentable despois de todas as adversidades ás que debemos facer fronte.
Apelamos ás autoridades públicas, lamentablemente, sen recibir respostas. Por tanto, lamentamos moito anunciar que tomamos a firme decisión poñerlle fin a nestras actividades e pechar as portas do Centro Galego de Bruxelas “A Tentation”.
Non podemos despedirnos sen trasladar o noso maior agradecemento a todas aquelas persoas que fixeron posible estes 40 anos de cultura galega en Bruxelas:
- aos centos de voluntarios que nos apoiaron ao longo destes anos
- aos bailaríns e músicos que animaron os nosos numerosos festivais e actuacións
- aos traballadores, os estudantes e os bolseiros que se encargaron da nosa programación sociocultural e imaxinaron todo tipo de actividades
- aos camareiros e os cociñeiros que prepararon as especialidades galegas con tanto respecto
- aos nosos socios que visitaron o noso establecemento cada semana
- aos moitos artistas que enriqueceron a nosa programación coa música e a danza
- aos nosos amigos españois en Bruxelas que sempre estiveron presentes en todos e cada un dos nosos eventos e festivais
- aos nosos amigos belgas e estranxeiros que foron seducidos pola nosa cultura e con quen comparto tantos momentos fermosos
- aos Amigos de Santiago e aos peregrinos polos seus consellos e colaboración na promoción do Camiño de Santiago durante tantos anos
- ás institucións e ás autoridades públicas pola súa confianza e apoio ao longo destes 40 anos.
Pola nosa banda, gardaremos na memoria todos estes momentos de intercambio cultural tan enriquecedores e esperamos que vostedes fagan o mesmo.
- A Xunta Directiva do Centro Galego de Bruxelas A Tentation.
