O pasado venres, anunciou o o sometemento a información pública do novo proxecto do treito de 5,5km entre Santa Irena e a estrada que une Camariñas e Vimianzo nun acto no que participaron a conselleira de Vivenda e Planificación de Infraestruturas, María Martínez Allegue; a delegada territorial da Xunta na Coruña, Belén do Campo; o director da Axencia Galega de Infraestruturas, Francisco Menéndez; deputados do PP do parlamento galego; e concelleiros do PP na comarca. Un acto que non agradou ao BNG da Costa da Morte xa que segundo os nacionalistas serviu para "anunciar o que para o BNG Costa da Morte xa debera estar rematado hai anos na nosa comarca: as obras da autovía á Coruña; un anuncio de futuribles, porque nin teñen o proxecto aprobado definitivamente, nin licitaron as obras, nin teñen asignados os fondos necesarios no orzamento para comezar as obras da non autovía”.

Os nacionalistas sinalan que a conselleira “non tivo a ousadía de dicir con claridade o que xa todos sabemos, que non van a rematar a autovía como tal, senón que van a facer un corredor de un só carril por sentido”, e reprocharon aos populares que “utilizan frases como ‘prolongación da autovía’ cando non van facer unha autovía, e queren seguir enganando aos veciños e veciñas da comarca cando afirman que seguen aumentando o número de quilómetros de vías de alta capacidade de titularidade autonómica, cando un corredor non é unha vía de alta capacidade”.

A formación nacionalista subliña que “sería bo que a consellería nos informara que van facer cos 8 millóns de euros orzamentados que non van executar este ano nests infraestrutura, e se a licitación do proxecto vai a supoñer unha peaxe encuberta como o tramo de Salto a Carballo”.

O deputado do BNG da Costa da Morte, Oscar Insua, declarou “que o Partido Popular non ten vergoña, xa o sabíamos, pero que se atrevan a vir a vender o que nin sequera é unha autovía, cos deberes sen facer e dez anos despois de cando dixeron que ía estar rematada; é unha indecencia”.

O político corcubionés proseguiu afirmando que “é unha indignidade a utilización das institucións, como a Xunta, que representa a todos e todas, para facer propaganda encuberta do Partido Popular; o normal é que a Xunta convidase aos cargos institucionais da comarca, non só a tropa das súas filas, e menos cando permaneceron calados todos estes anos ante a discriminación dos seus dirixentes na Costa da Morte”.

Por último, Insua manifestou que “teñen que poñerse xa co proxecto do tramo ata Berdoias, desdobrando en autovía, porque van converter o cruce do centro de Vimianzo nun auténtico funil caótico; e o mesmo co traxecto de remate en Cee e a variante do polígono de Cee ao porto de Brens. Ao PP prometer dáselles ben, cumprir non tanto, e iso que son as súas propias promesas”.