O sector lácteo concentrarase en Santiago

07:15 23/03/16

A industria ameaza con non recoller o leite de moitas das granxas e cooperativas da comunidade. Imaxe: Eu son MZ O próximo xoves 31 de marzo, o sector lácteo está chamado a unha concentración en apoio ao sector que terá lugar ás 11:30 horas diante do edificio da Xunta en San Caetano. Esta medida, organizada polos colectivos integrantes da Plataforma pola Defensa do Sector Lácteo Galego, tomárona ante as ameazas das industrias de deixar de recoller o leite en numerosas granxas e cooperativas, polo prezos, pola pasividade da administración,... situación que está levando a que moitas granxas de leite da Costa da Morte xa se cambiaran á producción de carne. Esta é a primeira das mobilizacións que se levarán a cabo en protesta pola desaparición do sector lácteo galego do que directa e indirectamente viven miles de familias. No mes de setembro do 2015, o Ministerio asinou coa Industria e coa Distribución un acordo no que se prevía a construción dunha cadea de valor sostible, garantindo as marxes de todas as partes da cadea. "Fronte a estas declaracións de intencións, centos de granxas galegas estamos a percibir os prezos máis baixos do estado e da UE", sinalan dende a Plataforma pola Defensa do Sector Lácteo. Durante todo o ano, as granxas galegas rexistraron os prezos máis baixos de todo o estado. A caída de prezo medio nos últimos dous anos foi de 20,10% no estado (de 0,388 euros en novembro de 2013 a 0,31 euros en novembro de 2015), mentres que enGaliza a caída foi dun 26,41 % (de 0,39 euros en novembro de 2013 a 0,287 en novembro de 2015). Ameazas A Plataforma critica que mentres as granxas galegas recibían ameazas de que se lles deixaba de recoller o leite, seguía a incrementarse a chegada de fóra de produtos lácteos a baixo prezos como queixos e mesmo de leite líquido, sen que houbese un sistema de seguimento transparente tanto en relación coa entrada e saída de produto de leite nas industrias, así como nos prezos de pagamento e de cesión logo á distribución, ou mesmo no destino real de moito do leite que se pagaba a prezos de leite en pó ou para a intervención. Ao parecer, nestes meses tamén houbo un número moi importante de granxas que tiveron que afrontar impagos, especialmente por parte de primeiros compradores, a imposición de condicións e de liquidacións mensuais abusivas, nas que se vulneran os dereitos das persoas produtoras.