Mércores. 01.02.2023
El tiempo

Unindo fervenzas para loitar contra o megaparque eólico

Andaina contra os eolicos de Santa Comba Carballo e Coristanco 1
Imaxe da lectura do manifesto contra os Eólicos na Fervenza de Castriz
Unindo fervenzas para loitar contra o megaparque eólico

Repetiuse a foto do ano pasado, pero este domingo 4 de agosto non houbo que desafiar, ademais de aos eólicos, á chuvia. A Plataforma Non Eólicos Bustelo – Campelo – Monte Toural organizaba un roteiro reivindicativo en defensa do rural e contra o “megaparque” eólico proxectado nos concellos de Carballo, Coristanco e Santa Comba

Un cento de persoas animáronse a unir as fervenas de Entrecruces (Carballo) e Castriz (Santa Comba) a pé, para demostrar o fermoso patrimonio natural que será debastado por esta enerxía “limpa”.

A ruta parrtiu de Vilela, e pasou por varios núcleos de poboación afectados polos novos parques eólicos, como son A Abelenda e Mira (Coristanco), comprobando ademais o impacto evidente doutros parques eólicos xa existentes, como é o do Monte Castelo, situado xusto detrás das vivendas do núcleo coristanqués da Abelenda.

No punto de chegada, procedeuse á lectura dun manifesto, no que se sinalaron as graves consecuencias que tería a instalación destes “tres parques eólicos, ou mellor sería dicir, un megaparque” dividido en tres para acollerse á autoestrada da depredación posta en marcha pola Xunta de Galicia en forma de Lei”. Unha infraestrutura que afectaría gravemente ao modo de vida sostible propio desta zona rural, á súa economía agro gandeira e tamén poría en perigo a contorna da Lagoa de Alcaián, onde nace o o río Mira, que alimenta de auga ao río Xallas (que desemboca de xeito tan espectacular no Ézaro) e onde sobreviven varias especies protexidas e en perigo de extinción, tanto animais como vexetais, algunhas delas, como é o caso da Centauria Ultreia, únicas no mundo.

A lectura do manifesto deu paso a unha regueifa, moi crítica co tratamento político da situación, que ofreceron as Pataqueiras de Coristanco e a xornada continuou pola tarde cun xantar popular ao carón da fervenza.

Andaina contra os eolicos de Santa Comba Carballo e Coristanco

Nesta acción colaboraron varias entidades dos 3 municipios afectados polo “megaparque” eólico Bustelo-Campelo-Monte Toural, entre as que cabe destacar a Asociación Cultural e Veciñal A Fonte Salgueira, As regueifeiras Pataqueiras de Coristanco, A Asociación de Mulleres Rurais Airiños do Xallas e tamén o concello e Protección Civil de Santa Comba.

Novas relacionadas cos Eólicos

comentarios