Segunda fin de semana de maio, sen ponte, pero con moitas cousas que facer. Unha fin de semana na que arrinca a campaña das Europeas con varios mitines, pero no que música, ruta cabalar, festas, teatro… pero sobre todo 3 rutas de sendeirismo serán as protagonistas. E para as rutas é necesario saber que tal vén o tempo, e para iso lemos o que nos contan os amigos de 4gotas, que nos traen un parte que, se ben alegre, alegre non é, polo menos apenas haberá chuvias:
O venres amencerá con moitas néboas e nubes baixas que mesmo mollarán, a partir de media mañá irán a menos. Desaparecerán no mediodía entre Fisterra e Muros, quedando na parte norte todo o día, por mor dos ventos frouxos do noroeste.
O sábado non mellorará moito a cousa. Estará un tempo "morriñento". Teremos que seguir falando de moitas nubes baixas, que acabarán deixando algún orballo moi intermitente.
O domingo amencerá aínda con nubes, pero axiña acabarán por desaparecer na mañá e semella que lucirá o sol todo o día. Iso si, as temperaturas non pasarán dos 17-18ºC.
O tempo do domingo, aínda non se pode considerar 100% fiable, polo que é recomendable botarlle unha ollada á web o sábado para confirmalo.

3 citas coa natureza

Sen lugar a dúbidas, e quen nolo ía dicir o ano pasado, o sendeirismo é o referente das actividades nas fins de semana primaverais. Estes días temos 3 saídas. Comezamos o sábado a primeira hora da mañá coa Andaina polas nubes de Muxía, con subida incluída ao Monte Facho (menudas vistas) e a zona de Lourido, onde están a construír o famoso parador de Muxía.
O domingo haberá doble sesión, a Ruta de Senda Nova polo Coristanco histórico, e a 6ª etapa do Camiño dos Faros, que nos levará de Camariñas a Muxía, pasando por lugares como a praia do Lago, Merexo, e rematando nas pedras da Barca.
Ollo, que o sábado pola tarde, os trasnos xa estarán por Muxía armando a previa, con visita guiada pola vila da Barca, visita ao Museo de Fotografía Ramón Caamaño e concerto da Traskiband.

Moita música

Será a noite do venres unha noite no que a música será protagonista. Destacamos o concerto de Albas Rusa co Rebumbio da Costa en Aldea Madeira, pero tamén poderemos escoitar algo de blues no concerto de Javi Turnes play alone en Cee, ou o Concerto do vimiancés Serj na Ponte do Porto. Teremos ademais tamén na noite do venres un monólogo de Ramón LSD en Cee.

Para o sábado, toca Concerto de Los Claretes en Vimianzo.

De ruta cabalar, folclore e de festa

Dúas citas singulares temos tamén estes días. O sábado teremos a III Ruta Cabalar Costa da Morte polas terras de Soneira.
Para a tarde do sábado e amañá do domingo, podemos achegarnos ao Festival Folclórico de Lires.
E para a tarde-noite do sábado, O Cairo se convertirá nun campo de festa máis que de fútbol para celebrar as Festas de San Corme CF, celebrando así, tralos dous partidos de xuvenís e maiores, o título da Liga da Costa acadado pola marea azul a semana pasada.

Que non falte o Teatro

Non hai fin de semana sen posibilidade de ir ao teatro na Costa da Morte. Estes días segue en marcha a Mostra de Teatro Xosé Agrelo de Muros, e teremos o sábado pola tarde cita con Talía Teatro e unha obra para o público familiar.
E como non podía ser doutro xeito, pechamos a fin de semana coa programación continua do Concello de Vimianzo, e desta volta o facemos ca A compañía Fantoches Baj e a montaxe “O Asombro con Díaz Castro”, no marco do “Mes das Letras”, e como recordo ao autor homenaxeado este 2014.

Máis información

• www.axendacostadamorte.com.

Fonte

• Redacción de QPC ([email protected]).