Jimi Hendrix será homenaxeado no Rockin' Carballo; o festival de música alternativa das festas de San Xoán que se celebra o 1 de xullo e que foi candidato nos premios Fest 2016. Está considerado como o mellor guitarrista de rock da historia e comparte protagonismo cun carballo nun cartel de gran potencia visual grazas á creatividade do deseñador carballés Juan Félix Gende. Este ano cúmprense 75 anos do nacemento do músico norteamericano, que marcou un antes e un despois na historia do rock co seu inconfundible estilo, e a asociación cultural San Xoán quere que este ano tamén marque un antes e un despois na historia do Rockin’. O festival celebrarase o sábado 1 de xullo na zona do Rego da Balsa. Pero este ano a carpa non será o único escenario. O rock soará tamén noutro espazo urbano e nun horario diferente ao habitual do Rockin’, xa que por primeira vez haberá sesión vermú. Proximamente confirmaranse os grupos que participarán no festival. O Rockin’Carballo está organizado pola asociación cultural San Xoán e patrocinado polo concello de Carballo.

Novas relacionadas

• O Rockin’ Carballo e o Nordestazo, candidatos aos Premios Fest

Fonte

• Redacción de QPC ([email protected]).
• San Xoán Carballo.