Xoves. 28.03.2024
El tiempo

Talía Teatro e Vicente de Souza traen dous novos premios á Costa duns María Casares máis reivindicativos ca nunca

Talía Teatro e Vicente de Souza traen dous novos premios á Costa duns María Casares máis reivindicativos ca nunca
Esta pasada noite de martes 3 de abril de 2012, celebrábaronse na Coruña os XVI Premios de Teatro María Casares, que outorga a Asociación de Actores e Actrices de Galicia AAAG. Emotiva e, coma sempre, comprometida, a gala celebrouse nun ateigado Teatro Rosalía de Castro, o único dos grandes teatros que sobrevive na cidade herculina. Antonio Durán, Morris, presidente da AAAG abriu a sesión, e foi Xosé Luís Méndez Ferrín, presidente da Real Academia Galega que leu o Manifesto Galego do Día Internacional do Teatro, redactado polo propio escritor. Un dos ecos que se escoitaron con máis forza, foron as verbas de Lino Braxe: "o teatro leva 3.000 anos aquí e vós acabades de chegar". Os premios chegaron, e ademais de encumbrar á obra Citizen, de Chévere, o fixeron en clave costeira. Artur Trillo, Sechu Sende, Avelino González e María Ordóñez, levaron o Mellor Guión Orixinal por Pelos na Lingua, de Talía Teatro. María Ordóñez falou, e o fixo en jallejo, en jallejo da Costa ademais. Artur Trillo lembrou a Sechu Sende que non puido estar alí, e aos que estiveron ao carón de Talía Teatro. E claro, a Dani Trillo e Diego Rey que estiveron sempre dende dentro. Talía Teatro non puido levar o premio no mesmo espectáculo á Mellor Dirección, ao polivalente Avelino González, que xa levantou varias xarras. Tamén subíu ao estrado Vicente de Souza que quedou co premio ao Mellor Actor Secundario por Tango, de Sarabela Teatro. O vimiancés quedou cun premio ao que tamén era candidato o cormelán Víctor Mosqueira por Ópera dos Tres Reais, do Centro Dramático Galego. A que tampouco puido celebrar a súa estrea cunha xarra foi María Lado. A poeta ceense era candidata ao premio de Mellor Actriz Secundaria por Oeste Solitario, de Producións Teatrais Excéntricas. Neste caso a galardoada foi Mónica García, poa súa actuación en Citizen Total, do Grupo Chévere.

Recoñecemento á Sala Nasa

Miguel de Lira, á dereita, recollendo o premio a Sala Nasa, con Xesús Ron e Manuel Cortés Outro dos que falou foi Miguel de Lira. O liracho falou en nome da Sala Nasa, recollendo o premio xunto a Xesús Ron e Manuel Cortés. A Academia quixo premiar a súa labor dinamizadora. Unha homenaxe foi extendida, a través dunha solemne oda de pasamento, a todas as salas que levando pechando nos últimos anos, aos centros culturais, á Consellería da Cultura e ata a todos os Concellos que se viron na obriga de deixar de programar. Para rematar o propio Miguel de Lira fixo referencia a Leo Bassi, que finalmente poderá estar en Santiago a pesar da censura de Conde Roa, e tamén en Corcubión o vindeiro sábado 14 de abril.

Repetindo candidaturas

E de novo, os nosos non volven de baleiro desta gala. O ano pasado foron a actriz de Talía Marta Ríos e o malpicán Santi Romay os galardoados; no no 2010 foi a obra Palabras encadeadas a triunfadora para os premios á Toño Casais como Mellor Actor e Artur Trillo como director; e no 2009, os premiados eran precisamente Artur Trillo e Víctor Mosqueira.

E unha pinchada para rematar

A noite coruñesa pechábase cuns petiscos e un pouco de música da man da pincha coruñesa Analís.

Os gañadores dos Premios María Casares 2012

MELLOR MAQUILLAXE: Na categoría de mellor maquillaxe a gañadora foi: Trini Fernández Silva (A Ópera dos tres reás, do Centro Dramático Galego). Os outros nomeados eran Fani Mosqueira (por American Café, de Teatro do Morcego) e Raquel Fidalgo (por Tango, de Sarabela Teatro). MELLOR VESTIARIO: En mellor vestiario levou a xerra Carlos Alonso (A Ópera dos tres reás, do Centro Dramático Galego). Os outros finalistas eran Paco Conesa (por Piratas, Teatro do Noroeste); e Ruth D. Pereira (Tango, Sarabela Teatro). MELLOR ESCENOGRAFÍA: En mellor escenografía a xerra de María Casares foi para Paco Conesa (por Piratas, Teatro do Noroeste). Os outros nomeados foron Baltasar Patiño (A Ópera dos tres reás, do Centro Dramático Galego) e Chévere (Citizen Total, Grupo Chévere). MELLOR ILUMINACIÓN: Na categoría de mellor iluminación destacouse a Octavio Mas (por Oeste solitario, de Producións Teatráis Excéntricas). Os outros nomeados eran Baltasar Patiño (A Ópera dos tres reás, do Centro Dramático Galego) e Fidel Vázquez (Citizen Total, do Grupo Chévere). MELLOR MÚSICA ORIXINAL: Na categoría da mellor música orixinal gañou Xacobe Martínez Antelo (Citizen Total, Grupo Chévere). Os outros finalistas eran: Nacho Sanz (Soños, Bichakadela) e Piti Sanz (por Oeste solitario, de Producións Teatráis Excéntricas). MELLOR ADAPTACIÓN-TRADUCIÓN: A mellor adaptación-tradución foi parar para Avelino González (por Oeste solitario, de Producións Teatráis Excéntricas. Os outros finalistas eran:) Pepe Sendón (A Ópera dos tres reás, do Centro Dramático Galego) e Xosé Manuel Pazos Varela (por “E.R.” (Algún día traballaremos xuntas), de Teatro do Atlántico). MELLOR TEXTO ORIXINAL EN GALEGO: Na categoría de mellor texto orixinal en galego destacouse a Avelino González, Artur Trillo, María Ordoñez e Sechu Sende (por Pelos na lingua, de Talía Teatro). Tamén estaban nomeados en mellor texto orixinal Manuel Cortés (Citizen Total, Grupo Chévere) e Santiago Cortegoso (con 0,7% Molotov, de Teatro de Ningures). MELLOR ACTRIZ SECUNDARIA: Como mellor actriz secundaria destacouse a Mónica García (Citizen Total, Grupo Chévere). As outras nomeadas eran María Lado (Oeste solitario, de Producións Teatráis Excéntricas); Marta Pazos (A Ópera dos tres reás, Centro Dramático Galego); e Victoria Pérez ( Piratas, Teatro do Noroeste). MELLOR ACTOR SECUNDARIO: O galardón para mellor actor secundario foi para Vicente de Souza (Tango, Sarabela Teatro). Os outros finalistas eran César Goldi (A Ópera dos tres reás, Centro Dramático Galego) e Víctor Mosqueira (A Ópera dos tres reás, Centro Dramático Galego). MELLOR ACTRIZ PROTAGONISTA: Na categoría de mellor actriz protagonista premiouse a Patricia de Lorenzo (Citizen Total, do Grupo Chévere). As outras finalistas eran: Luísa Merelas (“E.R.” (Algún día traballaremos xuntas), de Teatro do Atlántico); e Susana Dans (“E.R.” (Algún día traballaremos xuntas), Teatro do Atlántico). MELLOR ACTOR PROTAGONISTA: A xerra como mellor actor protagonista foi para Evaristo Calvo (Oeste solitario, de Producións Teatráis Excéntricas). Os outros nomeados eran Antonio Durán “Morris” (O florido pénsil, de Eme2 emoción&arte) e Josito Porto (O florido pénsil, de Eme2 emoción&arte). MELLOR DIRECCIÓN: Na categoría de mellor dirección destacouse a Xesús Ron  (Citizen Total, Grupo Chévere). Os finalistas foron Avelino González (por Pelos na lingua, de Talía Teatro) e Xúlio Lago (con “E.R.” (Algún día traballaremos xuntas), de Teatro do Atlántico). MELLOR ESPECTÁCULO: Finalmente, na categoría de mellor espectáculo destacouse a Citizen Total (Grupo Chévere). Os outros nomeados eran O florido pénsil (Eme2 emoción&arte) e Oeste solitario (Producións Teatráis Excéntricas)

Máis información

Novas relacionadas

Fonte

Comentarios