A Liga da Costa despútase na montaña

Deportes Fútbol da Costa

Redacción

11:39 04/12/15

Corredoira estrearase no banco do Baíñas ante os seus ex do Zas. Foto do ano pasado de Paula

Nova xornada costeira cunha marea de partidos en liza, xa cos resultados e os calendarios da Ligas de FS actualizados.

Unha xornada marcada polas urxencias na Preferente, cos dous equipos en postos de descenso e con partidos complicados. O Xallas visita ao líder, o Arteixo, na mañá do domingo, e o Dumbría recibe ao 3º, o potente Arzúa, ambos ca necesidade de sumar.

Novo derbi

Imaxe dun Baio-Sofan da tempada pasada-Foto-Santi Soneira

E seguimos de derbis na 1ª Autonómica, desta volta no Pratas Reinoso entre un Baio ao que lle sentou ben o cambio no banco e a chegada dos enfrontamentos costeiros, e un Sofán moi ben situado na parte noble da táboa.

Polo demais, necesita sumar os tres puntos o Corme en Lousame para ir apagando lumes. E quen ten que apagar bos lumes é o Malpica, despois da goleada humillante da semana pasada. Recibe ao Palmeira, e de perder podería pechar a xornada en postos de descenso.

Máis arriba, o Outes recibe ao Agolada para seguir subindo, e o Soneira terá un choque clave para medir se é ou non é un dos serios candidatos ao ascenso. Visita Rianxo, para medirse ao potentísimo Unión, 2º clasificado a só un punto dos soneiráns.

Unha Liga da Costa con novidade no banco e solidariedade

Emotiva será a volta de Corredoira aos banquiños. O novo míster do Baíñas enfróntase ao equipo que foi a súa casa durante moitos anos, un Zas líder, nun choque que servirá para moitas cousas. Será o partido da xornada, sen dúbidas, con permiso do Partido Solidario que organiza a UD Cerqueda ante o Camariñas.

Espera o Ponteceso un tropezo dos zaenses, pero non poderá fallar na súa visita ao Ameixenda. Por detrás, o San Lorenzo recibe a unha moi boa Esteirana, e o Mazaricos, tras 8 partidos sen perder, visita o campo doutro aspirante en horas baixas, o Castriz.

Un 3ª de cambio

Tamén na 3ª teremos novo adestrador esta semana. A directiva do Montelouro decidía prescindir de Marcelo pola falta de sintonía entre xogadores e adestrador, e esta tarde de venres decidirán o seu relevo. Precisamente o cadro loureán enfrontarase ao líder, o Corcubión, mentres o Laxe, o único invicto do Fútbol da Costa, quere manter o nivel ante un Lira que vén mellorando nas últimas xornadas.

Sábado de Fútbol Base no Conco

Reciben os Cadetes do Dumbría no Conco ao Coruxo o sábado pola mañá mentres que os xuvenís fan o propio pola tarde nun choque fundamental para medir as aspiracións dos de Leis e Lobelos. Chega o Racing Vilalbés, líder da competición con 5 puntos de vantaxe sobre o Dumbría, 2º.