FSF: Líderes costeiras

Deportes Carnota Cee Muros Ponteceso Vimianzo

FSF: Líderes costeiras

11:35 20/10/15

As Roxiñas de Lira non puideron co Ártabras Nova xornada completa de Fútbol Sala costeiro. Se na Liga Autonómica o Fisober volveu gañar na casa, na Liga Provincial tiñamos un derbi. As debutantes do Atletes recibían a un potente Vila de Cee que deixaba patente a súa aposta este curso por estar na zona de arriba e xa está de líder. Teremos que estar atentos ao forte Ponteceso FSF, que se sitúa na 2ª praza a só 2 puntos das ceenses. Ademais, as Roxiñas de Lira seguen mellorando na súa competitividade pero non puideron sumar. Nas féminas, Patri segue sendo peza clave no liderado do Viaxes Amarelle da 2ª, mentres Eva quedou na casa e non viaxou co Burela da máxima categoría. En categoría masculina, seguen os mozos do Vila de Cee demostrando que son un equipo tremendamente competitivo, e así o demostraron en Ferrol ante todo un O Parrulo.

Liga Autonomica, xornada 4

Resultado: FISOBER F.S.F. – HÉRCULES CAFETERÍA LA BRÚJULA (3-1).
FISOBER: Leti, Ana, Paula Fandiño, Laura e Tamara; tamén xogaron: Andrea Muíño, Mai, Inés, Nuriña, Noe.
Goles: 1-0 Tamara, 2-0 Noe, (descanso) 3-0 Noe, 3-1 Bego.

Mai, Noe e Leti no choque do Fisober Volvía o Fisober ao pavillón vimiancés nun partido que comezaba con 45 minutos de retraso pola chegada tardía dos colexiados. Pero a pesar de que esa situación descolocou un pouco os equipos no seu quencemento, foi un gran partido cheo de ocasións, con ritmo e dos que gusta ver ao espectador. As costeiras fixeron un partido moi completo tanto en defensa, como en ataque e lograron a terceira vitoria como locais esta tempada. O partido arrincou con dous equipos moi concentrados, sabedores que calquera erro se paga. Pronto se adiantaron as locais, foi cun gol de Tamara que apareceu no segundo pau para poñer en vantaxe as súas aos catro minutos. Iso deulle un pouso de tranquilidade e seguridade ao Fisober. Ese gol quizais provocou que o partido fose máis vistoso se cabe con dous equipos que buscaban o gol sen descoidar o traballo defensivo. O equipo visitante capitaneado pola fisterrá Rita e Bego poñía en apuros a unha moi inspirada Leti. E as locais percutían sobre Anabel. Foi aos dez minutos cando nunha contra Noe facía o dous a cero e daba máis marxe ás locais. As visitantes seguían traballando para reducir distancias e o Fisober buscando algunha contra para amplialas. Á volta dos vestiarios cambiou o decorado, as herculinas deron un paso adiante na súa presión o que permitía máis saídas a contra das locais. O Fisober aproveitou a situación para saír unha e outra vez a contra. Xa no primeiro minuto da segunda metade foi Noe a que novamente marcaba para poñer o tres a cero. Quen si o logrou foi Bego a sete para o fin, poñendo o tres a un que á postre foi definitivo. O gol cambiou novamente a situación do partido, xa que as locais sentiron que un novo gol poñía en perigo o resultado e as visitantes viron novamente posibilidades de puntuar. Pero o electrónico xa non se moveu e os puntos quedaron definitivamente en Vimianzo.

Gol do Fisober

Liga Provincial, xornada 3

Resultado A.D. Atletes – FSF Villa de Cee (0-11)
A.D. Atletes FSF: Mariña; Cris; Sara; Marta; Bárbara; Alba; Antía; Ana.
Villa de Cee: Marta, Adriana, Alba, María de Dumbría e Andrea. Participando tamén Paula Leo e María Lijó.

Como ben reflicte o marcador, pódese dicir con toda xustiza que o partido non tivo color. Mellor dito, só tivo un color: o do Villa de Cee. E está tendo mala sorte o cadro debutante esteirán, pois xa leva 3 equipos que son favoritos para o ascenso, Grupo Worck, Santiago Futsal e o Villa de Cee. En Esteiro, o cadro ceense dirixido por Juan Jesús mostrouse como un equipo moi ben conxuntado, ben situado no campo, moi potente e, sobre todo, cun gran equilibrio en todas as liñas. As dúas partes foron de dominio visitante con algún tímido disparo a porta dende lonxe do Atletes. Os goles do Cee foron todos de diversa factura despois de boas xogadas moi combinadas. En apenas 3 minutos as Ceenses xa conseguiran marcar o primeiro gol e, cando remataba a primeira parte, un resultado de 0-4. A segunda metade foi de castigo para as locais.

Liga Provincial, xornada 4

As Roxiñas de Lira ante o Artabras

Resultado: Ártabras Fene FSF - Concello de Carnota Lira FSF (1-0)
Lira FSF: Lía, Inés, Martina, María e Alba. Tamén xogaron Terre, Uxía e Laura.

Saíron as de Fene a defender a súa portería e só atacando con dúas xogadoras, malia iso, tiveron o control do balón case todo o partido. Unha primeira parte gris das Roxiñas, as cales non atopaban o sitio no campo e non estaban cómodas tocando o balón. Produto dun erro das de Lira foi o único gol do encontro. Puido empatar Terre antes do descanso nun remate que foi ao pau. Nunha segunda parte na que as cousas non cambiaron moito, pois as de Fene seguían a ter o balón, estas tiraron máis a portería. Pero Lía, unha vez máis intratable, soubo facer ben as cousas na súa área. Nos minutos finais as Roxiñas tiraron de forzas extra e foron a polo empate, xa que tanto madrugón e o largo que se fai o viaxe notárono máis do esperado, mais non foron capaces de materializar as oportunidades que tiveron.

Liga Provincial, xornada 4

Resultado: Concello Ponteceso - Grupo Work (3-1)
Ponteceso FSF: Melani, Ana, Carla, Carmen,e Sandra - tamén xogaron – Noa, Chus, Zeltia e Cintia.
Goles: 0-1.- Ainhoa (min.9) 1-1.- Chus (min.10) 2-1.- Carmen (min.18); 3-1.- Sandra (min.38).

Gran partido deste Ponteceso que vai na mesma liña positiva do ano pasado. Conseguiu endosarlle a primeira derrota ao potente Grupo Work tras un partido intenso e traballado visto a tarde do sábado no Municipal de Ponteceso. Comezaba o partido cos dous equipos presionando arriba, mostrándose respecto e intentando ter o control do balón nos primeiros minutos. Pronto mostrarían as súas armas as visitantes, que probaban xa no minuto 2 cun tiro dende a frontal que sairía desviado. Pero o partido estaba moi igualado e as ocasións non chegaban por parte de ningún conxunto. Avisou primeiro o cadro visitante e pouco despois se metía por diante. Tras o gol reaccionaron as pondalianas, que comezaron a facer o seu bo xogo e a chegar á portería contraria. A alegría de adiantarse no marcador non lles duraba moito ás coruñesas, xa que Chus faría o gol do empate un minuto despois, peiteando un balón tras o saque de falta de Noa. Intentaban reaccionar rápido tamén as herculinas e Sandrita probaría cun disparo lonxano, pero este sae desviado. A partir dese momento as ocasións chegarían só desde as botas pontecesanas. Sandra, Chus e Cintia intentaríano, pero Bea evitaba o segundo do Ponteceso. As chegadas do Ponteceso eran contínuas e, nos últimos 5 minutos do primeiro período, tan só contarían cunha oportunidade de adiantarse no luminoso as visitantes, por medio dunha contra que corta moi ben a porteira pontecesana Melani. Carmen facía o segundo antes de ir aos vestiarios deixando as locais por diante no marcador. No comezo da segunda parte veríase case o mesmo que o visto na primeira. As xogadoras de Barca e Curro saían outra vez presionando arriba, pero con falta de intensidade, o que fixo que as coruñesas estivesen máis metidas no partido e tendo o dominio do balón. Pero estiveron ben en defensa e no treito final sentenciaban.

2ª División Estatal, xornada 3

Resultado: Futsi Atlético Féminas B - Viaxes Amarelle FSF (0-1)
Viaxes Amarelle FSF: Carmen, Laura Tesouro, Patri, Lago, Dolo (cinco inicial), María Gómez, Sheila, Uxía, Ana, Xiana.
Goles: 0-1 Dolo (min. 15).

Volveu ser titular Patri na nova vitoria do Amarelle na 2ª Estatal e as de Pili Costa seguen invictas e no máis alto da táboa.

Liga Provincial masculina, xornada 3

O Vila de Cee masculino na Malata

Resultado: O Parrulo F.S. – FSF Villa de Cee (1-1)
Villa de Cee: Rafa, Mario, Aitor, Tomás e Marroco. Participando tamén Josiño, Carlos, Estrella, Pablo Hidalgo e Purti.
Goles: 0-1: Marroco tras xogada de Aitor; (descanso); 1-1.

2º partido para os Senior Masculino Ceenses e 2ª saída fóra da casa, nesta ocasión tocou visitar Ferrol e disputar contra un dos cocos da categoría, o Parrulo F. S. B. nun pavillón, o da Malata, impresionante. Os ceenses chegaban mermados polas baixas de Jose Antonio, Juanjo, Miguelón e Champi pero demostraron que son un equipo xeneroso en esforzos e moi competitivo, acadando un valioso punto. Primeira parte moi disputada onde os Ceenses conseguiron adiantarse cun gol de Marroco nunha contra moi ven levada por Aitor. Nos últimos minutos da primeira parte o Parrulo estivo a piques de conseguir empatar, coincidindo nos peores momentos de FSF Villa de Cee, aínda que Mario erraba unha ocasion clarísima e Purti non acertaba a controlar cando o tiña todo ó seu favor. Xa na 2ª parte do partido, aos poucos minutos os locais conseguen marcar o empate nun lanzamento de falta. Sen virse abaixo os Ceenses puxeron máis intensidade ao partido disputando tres ocasións clarísimas por parte de Aitor, Hidalgo e Tomás, a partir deses momentos o colexiado cargou de faltas os ceenses e fixo que o Parrulo a falta de medio minuto para finalizar dispuxesen dun dobre-penalti o cal fallarían. Nesta ocasión as estrelas son: 3* para Tomás, o xuvenil do equipo o cal mostrou un soltura descomunal, 2* para o porteiro Rafa, o cal estivo sensacional cando máis fixo falta, e 1* para Marroco, 2ª semana consecutiva marcando. Na próxima semana o Vila xoga na casa frente o Libertad de Mera, o sábado ás 18:00h, e deseguido o equipo feminino.