FSF: Vila de Cee e Ponteceso ao mando

FSF: Vila de Cee e Ponteceso ao mando

07:37 26/01/16

Andrea da Piroja no partido do Fisober

Non rematou o partido o Vila de Cee pero parece que contará como vitoria. As ceenses lideran a Liga Provincial, con vantaxe sobre un Ponteceso que se afianza na segunda praza tras vencer no derbi a unhas Roxiñas de Lira que vendero cara a súa pel.

Mentres, na Liga Galega, o Fisober volvía gañar en casa e segue na 8ª praza cun ollo cara arriba.

Liga Autonómica, xornada 16

Resultado: FISOBER F.S.F. – COMARCAL A FERVENZA F.S.F. (5-3).
FISOBER: Leti, Ana, Paula Fandiño, Inés, Mai; tamén xogaron: Andrea Piroja, Andrea Muíño, Tamara, Laura.
Goles:1-0 Inés, 2-0 Mai, 3-0 Tamara, 4-0 Laura, 4-1 Carol, (descanso), 4-2 Yu, 4-3 Cris, 5-3 Ana.

Mai e Ines celebran un dos tantos do Fisober

Arrincou a segunda volta, e o fixo en Cee polos problemas de humidades no pavillón dumbriés. E foi un partidazo dos que fan afección polo fútbol sala e do que o público disfrutou. Cunha metade para cada equipo, o Fisober saíu lanzado na primeira e foi quen de aguantar o empuxe visitante da segunda para levarse a vitoria ante un gran rival como é A Fervenza que a pesares da súa xuventude desprega un xogo de moitos quilates.
Que o partido ía ter ritmo e que ía ser entretido xa se viu dende o primeiro segundo. Os dous minutos chegaba a primeira ocasión para as visitantes a cargo de Carol. A resposta do Fisober non se fixo esperar e nese mesmo minuto Inés poñía o primeiro gol para as locais.
Tan só un minuto despois era a local Paula Fandiño a que podía aumentar as distancias no electrónico pero non o lograba. Quen si o facía era Mai que os catro minutos poñía o dous a cero. O partido tiña un ritmo endiañado, e aos seis minutos Laura atopábase cunha Leti excelsa. Mediada esta primeira metade Tamara picaba o balón ante a porteira visitante para facer o tres a cero a prol das locais. A resposta non se facía esperar e un novo lanzamento de Laura era desviado por Leti o trabe. Agora eran Inés e Paula Fandiño as que podían aumentar diferenzas e Alba a que tentaba reducilas. Quen si atinou foi Laura aproveitando un rexeite para facer o catro a cero. Tardou pouco en respostar Carol que fixo o catro a un co que se chegou o tempo de lecer.

A volta dos vestiarios as visitantes saíron cun ritmo se cabe aínda maior espoliadas polo gol a fin da primeira metade. Aos catro minutos Yu facía o segundo gol visitante o que as fixo crecer aínda máis. Aos seis minutos era Cris a que facía o terceiro gol para as de Ferrolterra reducindo a mínima expresión a renda local. As visitantes despregaban un gran xogo e as locais tocoulles traballar en ambas áreas e así o fixeron dende a primeira ata a última. Nunha contra Inés a piques estivo de facer o quinto.
O partido non daba un segundo de respiro. Carol e Natalia atopábanse con Leti a seis para o fin. Nos últimos minutos o Fisober tranquilizou un pouco o xogo e pasou menos apuros ante unhas visitantes que arriscaban cada vez máis, iso si o axustado do electrónico apretaba o corazón de ambas escuadras.
Pero a tranquilidade definitiva non chegou ata que a tres segundos do fin Ana finalizaba unha contra para poñer o cinco a tres definitivo, baixando o telón a un espectacular enfrontamento.

Mai celebra un gol co Fisober

Liga Provincial, xornada 14

Resultado: Roxiñas de Lira - Concello de Ponteceso (0-2)
CONCELLO DE CARNOTA-LIRA FSF: Lia, Inés, María, Alba e María - tamén xogaron - Cristina, Martina, Laura e Araceli.
A.D.VILA DE PONDAL-CONCELLO DE PONTECESO FSF: Melani, Aniña, Carla, Zeltia e Sandra - tamén xogaron - Elsa, Chus, Cintia e Noa.
Goles: 0-1, m.18: Zeltia; 0-2, m.38: Zeltia.

Comezou a segunda volta no pavillón de Lamas de Castelo con unhas Roxiñas entregadas coma nunca no derbi comarcal ante todo un Ponteceso, aspirante ao asceso. Comezou con moito respecto entre os dous equipo. As visitantes presionaban arriba e intentaban chegar con xogadas á portería local. As primeiras en ter a oportunidade para adiantarse no marcador serían as locais, cun tiro de falta dende o borde da área, pero despexaría Melani sen problema. O Ponteceso foi entrando no xogo co paso dos minutos e foi mellorando.
Sandra tiña unha ocasión, cun tiro que desvia a porteira e Chus tiña a máis clara ata o momento, rematando a bocajarro e desvía a porteira cunha boa intervención. O encontro volvíase de ida e volta, e Zeltia tería outra ocasión cun tiro dentro da área que para a porteira. Zeltia faría o primeiro da tarde rematando na frontal tras un pase de Cintia.

Non baixaron os brazos as Roxiñas e decidiron seguir como estaban no partido, tranquilas, tocando o balón e xogando o seu xogo. Seguían tendo o balón as de Curro, pero algo máis imprecisas, presionando arriba e cometendo moitos erros, quizáis produto dos nervios ou da presa, mais as Roxiñas seguiron pecando de inocentes porque apenas tiraron. Un par de veces estrelaron Alba e Cris o balón contra a porteira de Ponteceso, e Martina tivo a oportunidade de empatar o partido nun balón que, unha vez máis, foi ao pau. Xa a falta de dous minutos para o remate do partido, nun erro defensivo das Roxiñas, o Ponteceso conseguíu marcar o segundo gol do partido, de novo obra de Zeltia, deixando así o marcador.

Partido bonito, limpo e sobretodo reñido en Lamas de Castelo o que se vivíu o sábado, malia a derrota, a sensación no xogo das Roxiñas foi boa e o Ponteceso é un equipo contra o que da gusto xogar. 3 puntos para que o Ponteceso siga na loita polo ascenso, mentres por Lira entonan o “xogamos coma nunca e perdemos coma sempre”.

Liga Provincial, xornada 14

Resultado: Grupo Work, FSF. - A.D. Atletes, FSF (8-1)
A.D. Atletes FSF: Mariña(P); Cris; Sara; Marta; Bárbara(1); Alba; Antía; Ana; Sandra.

Partido xogado no Pavillón Municipal de Mesoiro (A Coruña), en un horario (16:00h) que, según se está vendo, resulta un plus negativo mais, en contra do Atletes feminino. O partido ten moi pouquiña historia, tanto para o Atletes coma para o Grupo Work. Este, tremendamente superior ás de Esteiro, con mais calidade, mais forza, mais veteranía, en fin, o Atletes naufragou no Pavillón de Mesoiro. Cando transcurría o primeiro minuto de xogo, para non desentonar, o Grupo Work xa marca o seu primeiro gol. Este gol tan madrugador desarmou para o resto do partido o equipo de Esteiro. A través do superior xogo das coruñesas, mediante combinacións perfectas e superior físico, estas acosaban continuamente o Atletes. Así foron chegando os goles, que foron hasta catro, en esta primeira parte. Suspirou o equipo de Esteiro cando o árbitro señalou o descanso, xa que se vía impotente para conter o magnífico xogo do Grupo Work.

Na segunda parte, outro tanto do mesmo. Porén, as esteiranas chegaron unhas catro ou cinco veces ata a portaría das coruñesas; o suficiente para que a porteira Beatriz mostrase a súa gran clase. Seguramente, unha das mellores porteiras deste campionato. Tamén se deixou ver Ainhoa, con una gran clase, así como a directora do Grupo Work, Patricia, con gran calidade tamén. Durante a segunda parte, as coruñesas conseguiron bater por outras catro veces a portaría do Atletes, que ben puderon ser mais, de non ser por algúns fallos a porta vacía do Grupo Work.

Os tímidos ataques das esteiranas foron levados por Bárbara, que non tuvo hoxe o seu día, e Antía, que aínda non acaba de collerlle o ritmo a competición. Bárbara, cando xa se estaba acabando partido, foi a autora do único gol das esteiranas.

Liga Provincial, xornada 14

Resultado: Vila de Cee FSF - Espartanas (5-0)*
FSF Villa de Cee: Carla, Alba, Adriana, Andrea e María de Dumbria,. Participando tamén: Marta, María Lijo, Paula Trinidad e Serena.

* Partido suspendido no m.18 co 5-0 no marcador porque o Espartanas quedou sen xogadoras suficientes ante unha expulsión e dúas lesións.

Máis de 100 persoas o sábado en Cee para ver medio partido. Saíron totalmente a polo partido as Ceenses, dominando totalmente o xogo, sen dar ningunha opción de xogo o rival, nos 5 primeiros minutos as Ceenses xa dispuxeran de 5 ocasións de gol, mais a pelota parecía non querer entrar. Xa chegado o ecuador da primeira parte as Ceenses conseguen marcar por medio de Andrea de penalti, foi poñer o primeiro gol para así golear o rival marcando Alba en dúas ocasións e Adriana en outras dúas ocasións e levando o partido cun 5-0 a favor. Faltando dous minutos para finalizar a primeira parte suspendese o partido, pois o Equipo das Espartanas cunha expulsada e dúas lesionadas quedouse sen xogadoras para poder continuar o partido.
As Estrelas corresponden esta xornada 3* para Alba, dous preciosos goles, 2* para Adriana outros dous goles, e 1* para Serena. Para a semana tocaralle as Ceenses visitar Vila de Cruces, saída complicada contra un rival moi forte na súa casa.

2ª Divisón Estatal, xornada 15

Resultado: CFS Femenino San Fernando - Viaxes Amarelle FSF (3-3)
Viaxes Amarelle FSF: Carmen, Patri, María Romero, Lago, Dolo (cinco inicial), Laura Tesouro, Sheila.
Goles: 1-0 Jenny (min. 2); 1-1 Laura Tesouro (min. 20); 1-2 Lago (min. 22); 2-2 Jenny (min. 31); 3-2 Patri (min. 36); 3-3 Laura Tesouro (min. 37).

Rescatou un punto o Viaxes Amarelle da súa visita a San Fernando de Henares, marcando un tanto no teitro final tras ir perdendo en dúas ocasións. Clave foi a muxiá Patri, de novo titular.