Só David García Pichel dá unha alegría ao balonmán costeiro

Deportes Camariñas Outros Deportes balonman calvo xiria conservas boya

Só David García Pichel dá unha alegría ao balonmán costeiro

09:31 28/02/12

Mala xornada para os equipos costeiros na Liga Estatal, que tiñan, iso si, un ollo posto no 9º Campionato do Mediterrenáneo. Alí competía a Selección Española Xuvenil, na que participaba un xa habitual, o xogador do Calvo Xiria, de 1ª Estatal, e do Ifecgás Pereira Xiria, David García Pichel.
A selección proclamouse ademais campióna do "9º Campeonato Mediterráneo", disputado durante toda a pasada semana na localidade portuguesa de Lagoa. O combinado nacional que caía derrotado no derradeiro encontro da segunda fase ante Portugal, aínda que xa estaba clasificado para a final, impoñíase na gran final ante os lusos por un claro 31-19.

O xogador carballés anotaba 4 tantos na final, dando unha alegría ao balonmán costeiro. Debemos destacar tamén a aportación durante todo o campionato doutros dous xogadores galegos que formaron coa selección, o vigués Diego Piñeiro, xogador do Ademar de León, e o coruñés Ángel Iglesias, xogador do OAR.

Xa no tocante á 20ª xornada da Liga Estatal, ambos conxuntos pincharon. O Bm. Camariñas tiña unha final ante o pechacancelas e tras facer un ruinoso partido quedan con tan só 1 punto de vantaxe sobre o SAR e xa a 2 do 12º e a 7 do 11º.
Pola súa banda o Calvo Xiria caía ante o Paraxe Construcciones nun partido no que se xogaba moito o cadro carballés para non perder a estela do grupo de cabeza. Non defraudou ningún dos contendentes, que puxeron no Municipal de Chapela todo da súa parte para acadar o triunfo. Ao final os dous puntos quedaron en terras pontevedresas. O Calvo ve coma se afastan, aínda máis, os dous primeiros clasificados cando tan só quedan doce puntos en xogo.

SAR Plasticum - Bm. Camariñas (34-22)

BM. CAMARIÑAS: Cristian (p), Víctor (p), Alan (4), Fari (29, Fabián (2), Felipe (4), Pombo (2), Quin, Moncho, Catalán (6), José Ramón (1), Xabi, Perón, Antelo (1).

Paupérrimo partido do Camariñas ante a Sociedade Atlética. Peor non se puido xogar ante un rival directo, o partido entregar aos rivais antes do inicio do encontro, xa soamente coa actitude do arrequecemento víase a unha SAR totalmente centrada no partido, ante un equipo visitante, Camariñas, que practicamente non quentou, e o pouco que o fixo foi frouxo e con desidia. Consecuencia diso foi que ao comezo do encontro perdéronse ata 10 balóns practicamente consecutivos, ben por recepcións defectuosas, malos pases e tiros en superioridade que foron ás nubes. Os rivais, sabendo o que se xogaban saíron concentrados, motivados e aleccionados en como facer fronte ao Camriñas. A resposta do Boya foi apática, coma se non se xogase nada no envite, entregando o partido aos poucos minutos, véxase que a SAR non utilizou os dous tempos mortos que lle correspondían no segundo período.

Así, o Conservas ahcégase ao posto do pechacancelas, nesta experiencia en 1ª división, onde polo que se viu non existen equipos superiores en calidade técnica, pero si en actitude e formulación.

Paraxe Construcciones - Calvo Xiria (30-26)

Calvo Xiria (15+11): Iago [p], Dubra (1), Miguel (2), Manuel (5), Cuco (1), Alex García, Christophe (1) -equipo inicial- Naya [p], Ramón, Brais, Pablo (12) , Alex Zas (3), Sergio (1), Ángel.

Comezou o partido trabado e sen un dominador claro. A rixidez do xogo de ataque, froito dos nervios dun e outros, impedía que se visen ocasións claras de gol. Foi o Paraxe o que bateu primeiro apoiado na actuación de Lloria na portería. Marchouse no marcador grazas aos contragolpes e ao xogo co pivote. Pero o Calvo viaxara a Chapela para facer algo máis que de comparsa... Con Iago detendo un alto porcentaxe de balóns, cun xogo de ataque rápido e no que todos os xogadores anotaban gol, os carballeses non só recurtaron as diferenzas senón que se puxeron por diante no electrónico. O 14-15 ao descanso deixaba aberto o partido para os segundos trinta minutos.

O segundo tempo empezou coa mesma tónica do primeiro, Lloria detiña varios lanzamentos seguidos e o Paraxe retomaba o mando no marcador. Foron malos momentos para os de Carballo, que viron como a descualificación de Cuco (non é moi normal que un xogador sufra 4 exclusións, xa que o regulamento só permite 3) deixaba ao conxunto carballés cun home menos durante catro minutos (tiña que ter estado dous minutos con dous xogadores menos), circunstancia que aproveitaron perfectamente os locais para romper o encontro.

O Calvo tivo a cruz nos 7 metros, pois foi incapaz de converter en gol ningún dos tres dos que dispuxo. Tiveron aquí os de Chapela unhas aliadas inesperadas na parella arbitral, xa que non sinalaron ningún a favor dos carballeses por invasión da área de seis metros por parte dos xogadores do Paraxe, que no segundo tempo e sabedores da falta de lanzamento exterior neste partido por parte visitante, estiveron máis preto que nunca do seu porteiro, vivindo a cinco metros del e non aos seis habituais.

Nadou contra corrente o Calvo no que quedaba de partido pero foi incapaz de achegarse a menos de 2 goles. Nos derradeiros minutos tivo as súas opcións o Xiria pero os catro lanzamentos de seis metros detidos polo porteiro local de maneira consecutivo sentenciaron o encontro.

Vindeira cita

BM. CAMARIÑAS CONSERVAS BOYA - LAS CINCO JOTAS LAVADORES: sábado 03/03/2012 ás 18:30 no P. MPAL. "O AREAL".
CALVO XIRIA - EXP. MINERAS DEL MORRAZO BM. CANGAS: sábado 03/03/2012 ás 18:30 no P. ZONA ESCOLAR DE CARBALLO.