Vimianzo e Ponteceso preparan as Carreiras Pedestres e 3 concellos da zona entran no Circuito Provincial

Vimianzo e Ponteceso preparan as Carreiras Pedestres e 3 concellos da zona entran no Circuito Provincial

Deindo

08:56 30/04/14

O Atletismo colle estes días protagonismo con novas probas costeiras.

200 inscricións na carreira pedestre de Vimianzo

I Circuito de Carreiras Populares Costa da Morte

Ata o mércores día 30 de abril ás 12 da noite continúa aberto o prazo para inscribirse na III Carreira pedestre do Concello de Vimianzo, a segunda das carreiras incluídas o I Circuíto de Carreiras pedestres Correndo pola Costa da Morte, no que participan oito concellos. Para Vimianzo esta é xa a terceira edición dunha proba que asentada entre os atletas, pois moitos son os que repiten pero serán moitas as caras novas dun deporte tan en auxe actualmente entre a sociedade en calquera das franxas de idade. A cita será este domingo 4 de maio.

Poden participar na carreira nenos e nenas a partir dos 3 anos ata a categoría adulta repartidas en categorías do seguinte xeito: pitufo (nados 2007-2010), benxamín (2005-2006), alevín (2003-2004), infantil (2001-2002), cadete (1999-2000), xuvenil (1997-1998), sénior 5K (nacidos de 1996 en diante), sénior 10K (1996 – veteranos), veteranos M40 (40-49 anos) e veteranos M50 (50 anos ou máis). Os primeiros en saír da lina de meta, situada na Praza do Concello, serán os atletas da categoría infantil e cadete, ás 9.45 horas; os seguintes corredores, os xuvenís e sénior 5K sairán ás 10.20; ás 11 será o pistoletazo de saída para os atletas da Sénior 10K, veteranos M40 e M50, e os máis pequenos a partir das 12.15 os alevíns, 12.30 benxamíns e 12.45 os pitufos.

As categorías infantís participan de xeito gratuíto na proba mentres que os sénior e veteranos teñen que realizar o pagamento de 5€, se teñen chip, e 6€, se non o teñen, para poderen participar. As inscricións adultas deben realizarse a través de www.championchipnorte.com, quen se encargará de cronometrar a proba, mentres que as categorías infantís poden inscribirse a través de championchip ou no concello, logo de asinar a correspondente autorización paterna.

Nas categorías pitufo, alevín e benxamín todos os participantes levarán medalla conmemorativa, mentres que nas demais categorías haberá trofeo para os tres primeiros clasificados de cada categoría masculina e feminina e na categoría K10 haberá trofeo para o primeiro clasificado e clasificada empadroada en Vimianzo.

Carreira en Ponteceso

E xa están abertas as inscricións online a través de www.carreirasgalegas.com para a Carreira de Ponteceso. A cita será o domingo 18 de maio, e percorrerá o sendeiro PG-R 148 entre Ponteceso e a Praia de Valarés.

Circuito Provincial de Carreiras Populares

Presentada a segunda edición do Circuíto Provincial de Carreiras Populares que este ano chegará a 18 probas, fronte á decena do pasado ano. Comezarán este domingo 4 de maio en O Pino e rematarán o 9 de novembro en Negreira, coa proba máis lonxeva da provincia, que este ano cumpre a súa XXXV edición.

Son 3 as probas da Costa da Morte, en Carballo, Cee, e Muros. As carreiras populares costeiras serán 15 de xuño en Carballo, o 21 de xuño en Cee e o 23 de agosto en Muros, e serán paralelas ao I Circuito de Carreiras Populares Costa da Morte, se ben a Cee conta para os dous circuitos.