Dumbría viaxa a dúas rodas

Dumbría

14:13 04/02/15

Parece absoluta a aposta do Concello de Dumbría polo ciclismo. E así o amparan os datos, que indican que no último ano o turismo medrou un 155%, e boa parte de culpa a teñen as dúas rodas. Tres frontes ten abertas o concello dumbriés en materia ciclista para este curso. Mentres volve pelexar por un final da Volta no Alto do Ézaro, xa ten armada unha BTT para o mes de abril. Pero a grande aposta chámase este curso Gran Fondo Ézaro.

Gran Fondo Ézaro

A presentación terá lugar este mércores 11 de febreiro en Santiago de Compostela. Pero todos temos xa os ollos postos no sábado 4 de xullo. O Gran Fondo Ézaro é un evento ciclista de longa distancia, para ciclistas federados e non federados na modalidade de bicicleta de estrada, que se sitúa nun escenario ao bordo de Fisterra (Fin do Mundo). Iso si, con meta do Mirador do Ézaro, por suposto, elevando o mito das rampas do Ézaro, xa “un porto mítico en Galicia referencia da peregrinaxe do ciclismo”.

As miras son de altura, e o Concello dumbriés aspira a converter o Gran Fondo Ézaro nun punto de referencia dentro das actividades ciclistas de gran fondo europeas.

Xa pasou polo FITUR, e a vindeira semana coñeceremos máis desta aposta polas dúas rodas.