Reiteran, tras 30 anos de peticións, a necesidade dun contradique e dun porto deportivo en Fisterra
Volve a incansable Asociación de Veciños Costa da Morte de Fisterra, solicitar “a dotación ao porto de Fisterra de instalacións náutico-deportivas que faciliten a práctica dos deportes de vela, remo, piragüismo e outros, así como a atracada de embarcacións deportivas e/ou recreativas, tanto daquelas que poidan ter a súa base neste porto como daquelas que poidan atracar en tránsito”.
Unha petición amparada ademais pola data xacobea. “É absurdo que o porto de Fisterra sexa recoñecido como Porto Xacobeo e, con todo, careza dunha zona de ataque oficial para as embarcacións dos peregrins náuticos, en tránsito, con todos os servizos e medidas de seguridade”, explica Fernando Carrillo. Unha petición que xa se lle formulou dende o Concello fisterrán á Xunta no ano 1992.
Un Carrillo que mesmo ofrece alternativas. “Fai máis de trinta anos esta entidade veciñal vén reclamando a construción dun contradique na parte Norte do Porto de Fisterra que defenda do mar de vento do Nordeste, o cal é o predominante durante o verán. Este contradique pode ser similar ao que xa se instalou na parte Sur, é dicir, un dique flotante mediante a técnica de pilotaxe, o que evitaría calquera impacto ambiental e en cuxo interior se poderían instalar os pantaláns de servizo da zona deportiva do porto. Ademais, este contradique convertería nunha verdadeira dársena o interior do porto de Fisterra, favorecendo con iso ás embarcacións pesqueiras”.
A asociación lembra que o Concello xa fixo peticións ao COTOP, a Portos, tras mocións aprobadas por todos os partidos, polo que pide que se aprobe a redacción do proxecto.
