Se o Fútbol da Costa é o mellor do mundo, o Campionato de Barrios de Esteiro é Mellor Torneo de verán do mundo. Incrible o que se vive cada 15 de agosto no Xosé Luís Vara. O campo da Salina acollía este pasado venres 15 de agosto, no marco das Festas do Carme, a gran final da 46ª edición do senlleiro torneo. Despois das intensas semis, o pobo esteirán, e moitos amantes do fútbol da Costa de toda a volta, achegábanse para ver a finalísima entre os Ciclóns do Maio e Pentacosta.

Tiramos, como non, da crónica e fotos de Róber Pladur para dar conta da gran Festa do fútbol de Esteiro, que comezaba ás 18:30h cun partido de crianzas, dando conta de como se traslada de xeración en xeración ese sentimeno de pertenza e identidade ao teu barrio, e a todo Esteiro, a través do balón. Enfrontábanse unha miniselección dos “Da Ponte de aquí” (Independiente, Ciclóns e Carallo Santo) contra os “Da Ponte de alá” (Cánchester, Pentacosta e Abelleira) e o choque remataba cun 7-3 a favor dos “de aquí”.

Ás 20:00h, tralas gaitas, chegaba a gran final. Comezaba o choque moi intenso, Con Alex de Yi tendo que facer varias intervencións de mérito, a tiros de Toni ou Simón Casal. Co paso dos minutos os Ciclóns ían subindo liñas e se Manu de Yi e David Añón avisaban, Josiño abría a ala para os azuis. 

Saía enchufado o cadro v erde na segunda e Simón Casal vlvía facer aparecer a Alex de Yi, pero pouco despois Manu de Yi, o máximo goleador dos Ciclóns, ampliaba o marcador.
Non lle perdeui a cara ao partido o Pentacosta e seguíu aprentando, pero Jaime sentenciaba o choque nunha contra por banda permitindo que os Ciclóns se proclamen campións por segundo ano consecutivo.

Máis alá do fútbol, cómpre destacar o ambiente no campo, nunha auténtica festa, que demostra o potencial social do noso Fútbol da Costa.

”Loga vida o campeonato de Barrios de Esteiro”, claro que si, Róber!.

PALMARÉS DOS ÚLTIMOS ANOS DO CAMPIONATO DE BARRIOS DE ESTEIRO

• 2024: Os Ciclóns lévanse o XLV Campionato de Barrios de Esteiro a penaltis contra un gran Cánchester
• 2023: Cánchester, Campión despois de 32 anos!
• 2023: O Independiente de Uhia queda por primeira vez en décadas fóra das semis do Campionato de Barrios de Esteiro
• 2022: O Independiente repite título do Campionato de Barrios tras vencer a penaltis a un brillante Canchester
• 2019: O Independiente volve reinar no Campionato de Barrios de Esteiro
• 2018: Os Ciclóns do Maio levan, por segundo ano, o mítico Campionato de Barrios de Esteiro.
• 2018: Recta final do mítico Torneo de Barrios de Esteiro coas Semis.
• 2017: Os Ciclóns do Maio, campións do 40 Campionato de Barrios de Esteiro.
• 2016: O Independiente faise co campionato de Barrios.
• 2015: Abelleira campións dos Barrios de Esteiro de 2015.
• 2014: O Independiente, campión do Campionato de Barrios de Esteiro 2014.
• 2013: O Campionato de Barrios de Esteiro, unha competición singular: Independiente de Uhia faise co título.
• 2012: Un Ciclón arrasou no Campionato de Barrios de Esteiro.