O Malpica botou ao Sofán da Copa-Foto-SD Moitas sorpresas nesta volta dos Dezaseisavos da Copa da Costa 2017. Ás primeiras de cambio quedan fóra alomenos 5 equipos importantes, os 3 de Preferente (Xallas, Soneira e Sofán), un de 1ª (o Outes), o Rei de Copas (o Cee), e o líder da Liga da Costa (o Corme), entre outros. Estes Dezaseisavos deron conta da importancia do valor doble dos goles fóra da casa (ata 5 eliminatorias foron decididas por ese detalle), e nos deixou grandes partidos copeiros como os vividos en Baio, en Fontenla, na Pedra de Ouro ou no Municipal e Vimianzo.   O cadro da #CopadaCosta sempre en www.copadacosta.com

Buño - Ponteceso* (1-3)

Buño e Ponteceso en Xaviña-Foto-SD Traía o Ponteceso unha pequena vantaxe da ida, pero era o Buño o que se metía por diante case que sen querer cun gol de Jorgan tras un mal despexe do porteiro. Con ese 0-1 aos 10 minutos, era o Ponteceso o que tiña que reaccionar, pero foi o contrario. O Buño pechouse ben e dominou o tempo do xogo sacando perigosas contras. Sufría o Ponteceso varias lesións, pero seguía intentando e cando faltaban 20 minutos, Yago, a pase de Gurita, e tras varios rexeites, volvía a meter ao Ponteceso nos Oitavos. Aí, un balón ao longueiro do Buño puido cambiar o signo da eliminatoria, pois na xogada seguinte Eloy marcou o segundo e a sentenciou. El mesmo puxo a puntiña no último minuto. Foto-SD  

Muxía* - Castriz (3-1)

Imaxe do partido copeiro de Arliña-Foto-Muxía Onte non estiveron metidos no partido e ningún momento os xalleiros, ante un Muxía moi enchufado que fixo un partidazo, sabendo sufrir e loitar cada balón cunha intensidade espectacular. Adiantábase os de Ordóñez cun gol de Maikel, pero antes do descanso Adrián empataba dende os 11 metros para os xalleiros. Aínda tería que remar máis o Castriz se quería pasar tralo 3-3 da ida. Pero nada, a neurona dos xalleiros seguía atrofiada e o Muxía seguía superando unha e outra vez á defensa e foron Adrián Alcaina e Josiño os que conseguía sentenciar a eliminatoria. O líder da 3ª demostrou que pode competir perfectamente na Liga da Costa.    

Cerqueda* - Volantes (0-0)

Co 1-2 da ida en Muros, o Cerqueda soubo nadar e gardala roupa. Non arriscaron os de Periscal mentres que o Volantes tampouco estivo demasiado acertado e cos varios xuvenís non puido darlle a volta a eliminatoria. A nota do partido foi a colleita solidaria de xoguetes que a UD organizou para as familias máis necesitadas dos Servizos Sociais municipais.  

Coristanco - Zas* (1-0)

O 3-0 da ida a prol dos zaenses deixara practicamente a eliminatoria sentenciada, o que provocou un choque soso na Rocheira. Non foi boa a primeira parte dos de Víctor Pazos, que apenas inquedaron ao meta bergantiñán, e só a balón parado chegaba a unha área sempre ben defendida por Brais. Si que chegou o Coristanco con saídas en longo de Pazos, Magovi e Jorge, pero sen acerto, despois do gol inicial de Pazos, que abría o marcador e as esperanzas verdes aos 5 minutos tras un córner. Na segunda seguíu o mesmo guión, cun Zas moi pouco metido no partido e un Coristanco que o intentaba. Pazos volveu intentalo nun córner, Magovi tamén fixo lucirse ao meta Anxo Pallas. Só Lagoa tivo unha boa ocasión de falta para os zaenses, mentres os locais o intentaron sen sorte.  

Sofán - Malpica* (1-1)

Unha das sorpresas da xornada chegaba no Carral. Un Malpica irregular na Liga da Costa, podía cun Sofán, moi centrado na Preferente, que parecía estar xogando o trofeo das festas. O Malpica, cunha intensidade tremenda, cun Mario foi firme pelexando cada balón aéreo, foi superior en todo momento ao cadro carballés e acabou merecendo o premio do pase. O gol no inicio do segundo tempo dos locais, por medio de Bris, foi un espellismo, pois as ocasións eran visitantes. E tanto foi o cántaro á fonte que chegou o empate nun remate de Alex Marquez desviado por un defensa.

Esteirana* - Cee (1-1)

O Rei de Copas queda ás primeiras de cambio nun choque no se fixo valer o valor doble dos goles fóra da casa, despois dese 2-2 do San Paio de Refoxos. O Cee foi mellor ante unha Esteirana con moitas baixas, e tivo numerosas ocasións para darlle a volta á eliminatoria pero non estiveron acertados. Na primeira metade as maáis claras foron as de Martín, Samu e Uri, mentres a Esteirana, non chegaba á meta rival. Si que acertaba Manu para os locais xusto á volta do descanso, nun erro entre central e porteiro ceense.  Despois do empate houbo uns minutos de dúbidas pero pouco a pouco o Cee volveu a buscar a vitoria cunha ocasión clarísima na que Esteban, completamente só, remata fóra despois dunha gran xogada de Juan O Vello. Aínda tería o Cee dúas ocasións máis en sendos remates de cabeza de Uri e Chema pero non atinaron a marcar.  

Nantón* - Outes (1-1)

Valeu tamén o valor doble dos goles fóra de casa na eliminación dun Outes que parece sufrir síndrome do gol. Segue sen atopar o camiño do gol o cadro da Serra, que marrou ata 6 ocasións para cambiar o signo da eliminatoria, sobre todo tralo tanto de Mario tra varios rexeites de Guille. Aí chegaron as mellores ocasións de Mario, Yago, Martín, Chúa... pero o gol non chegou. O Nantón mantíñase na eliminatoria a base do carácter que amosa sempre en cada partido, e se atopaba cun gol olímpico de Redondo, que o colocaba en Oitavos.  

Xallas - Dumbría* (3-1)

Xallas e Dumbría en Fontenla-Foto-Xallas Era o partido máis interesante da eliminatoria, sen dúbida, un choque que ben podería ser (e xa ten sido) a finalisima. E non defraudou, tralo 2-0 da ida no Conco. O partido comezaba cun ritmo trepidante e un Xallas indo a por todas presionando ben arrriba. Pronto tiña premio esa presión e Camiño adiantaba aos verdes. O Dumbría tiña algunha chegada pero non era quen de acertar. Xa no comezo da segunda, e co mesmo guión, Anxo metía o 2-0 que igualaba a eliminatoria. O Dumbría seguía tendo boas ocasións pero non as materializaba mentres que os xalleiros estaban máis acertados. Como Doro, que se sacou unha volea cando quedaban 20 minutos para o final que parecía que metía de cheo ao Xallas nos Oitavos para delicia da parroquia xalleira. Pero nada máis lonxe da realidade. A 5 para o final aparecía Adrián Makaay para salvar o barco dumbriés, e á terceira, tras dúas boas ocasións, non perdoaba metendo aos de Julián nos Oitavos. Valeu tamén aquí o valor doble dos goles fóra da casa.

Laxe - Fisterra* (0-4)

Coa eliminatoria sentenciada da ida, o choque no Cabo Dárea non tivo moito interese. Adri (2), Jesús e Cote foron os goleadores fisterráns.  

Mazaricos* - Soneira (1-1)

Imaxe do choque copeiro en Pedra de Ouro-Foto-Soneira Outra eliminatoria na que fooi clave o valor doble dos goles fóra da casa. O 2-2 de Vimianzo daba unha lixeira vantaxe aos amarelos, que souberon xogar as súas bazas, e non se puxeron nerviosos cando o Soneira se puña por diante. Adiantaba Sandelo, natural de Mazaricos, ao Soneira nunha primeira metade moi igualada. Na segunda, o Soneira amosábase con pouca intensidade e permitía que o Mazaricos fose facendo dano, con chegadas á areá dun Chenel tremendamente perigoso, pero que non estaba acertado. Xa con pouca luz no campo do Pino do Val, chegaba o empate de Brais de falta que metía aos de Néstor na seguinte fase, deixando fóra outro dos favoritos ao título.  

San Lorenzo* - Seaia (5-1)

Non se deixou sorprender o San Lorenzo por un Seaia que chegaba vivo tralo empate da ida, pero con moitas baixas. Saíu con todo o San Lorenzo, apretando fórte e aos poucos minutos o colexiado sinalaba unha man dentro da área e expulsaba ao malpicán Josiño. Parou o meta Anxo a pena máxima pero quedaba moito tempo por diante para aguantar. Diego e Taibo abrían a lata deixando un 2-0 ao descanso que casen sentenciaba a eliminatoria. Pero seguía pelexando o cadro malpicán, e conseguían marcar e recurtar distancias por medio de Eme, poñéndose a un gol dos Oitavos. Pero un gol no que o meta visitante puido facer algo máis  ao comezo da segunda deixaba o partido claro para os locais cos goles de Parafita, Fuentefría e outro de Diego.  

Montelouro - Camariñas* (0-3)

Outra das eliminatorias que chegaba sentenciada da ida e que non tivo moito interese, con dous equipos reservando fichas. O Montelouro de feito xoga o xoves o chque aprazado ante a Esteirana polo susto de Juan de Celia, o sábado co Mazaricos. Os goles dos de Rosky, de Maikel, Nazo e Brandon.  

Baíñas* - Ameixenda (5-2)

Unha alegría leva na Copa este Baíñas que non acaba de situarse en Liga. E iso que foi un partido ben vibrante despois doutro choque tremendo co 4-3 da ida para os ceenses. Foi un partido estrano, máis igualado do que reflicte o marcador porque a eliminatoria estivo totalmente aberta ata practicamente o m.90, e no desconto foi cando se desatou, cunha actuación arbitral que deixou moi descontentos aos ceenses. Comezaba o Ameixenda buscando o control do balón, mentres que o Baíñas sacaba algunha contra con Jaime e Pablo como protagonistas. Pronto adiantaba Canay aos vimianceses nunhaboa xogada de Pablo. Puido empatar Cristian pouco despois nunha volea desde 30 metros que despexou Maikel de forma espectacular. E no m.20 o propio Cristian empataba o partido. Seguía máis cómodo o caro ceense pero era Jaime o que metía de novo aos locais por diante nunha xogada na que os ceenses pediron falta sobre o eterno Óscar Riolo. Co 2-1 e todo por xogar comezaba a segunda metade. O Ameixenda controlaba pero sen facer demasiado perigo e o Baíñas buscaba a contra. Nunha desas contras e cando faltan apenas 12 minutos para os 90 regulamentarios, Pablo Muíño marcaba o terceiro que parecía sentenciar a eliminatoria. Pero faltaba a traca final. Minuto 88 e Cristian mete o 3-2. O partido, e a eliminatoria estaban no aire, e aproveitando outra contra o Baíñas conseguía o 4-2 no m.90 por medio de Jaime. Todo parecía sentenciado de novo pero un tanto provocaría a prórroga. Era o minuto 94 cando o árbitro sinalou unha falta indirecta do Baíñas por perda de tempo do porteiro. Fai Chucho o lanzamento e os ceenses piden man, que non ve o colexiado, e á contra, con casi todos os xogadores ceenses parados, o Baíñas marca o 5-2 definitivo de novo por medio de Palo Muíño.  

Camelle - Cabana* (1-1)

Co 3-1 da ida chegaba o Cabana ao Rodeiro, e non o tivo fácil. Comezaba o choque cun minuto de silencio polo pasamento da avoa do cabanés Cacha, que ademais lle puido adicar o primeiro tanto da tarde, aos 5 minutos da segunda metade. A primeira fora de tanteo, cun choque igualado sen demasiadas ocasións. Tras eses bos 15 minutos cabaneses no comezo da segunda, o Camelle veuse arriba. Tivo o Camelle unha boa ocasión Felisiano dende os 11 metros para acurtar distancias na eliminatoria que parou moi ben Vázquez. E era Sergio o que marcou o empate a falta de 10 minutos, pero a pesar de facer un mellor partido os camelláns non puideron marcar. [fbvideo link="https://www.facebook.com/cabana.soc.dep/videos/704294526412545/" width="660" height="400" onlyvideo="1"]

Baio* - Corme (5-2)

Outro dos grandes que queda fóra. O partidazo entre os dous indiscutibles líderes da Liga da Costa deu conta de como son as competicións copeiras, pois puido pasar calquera despois do 3-3 da ida, pero foi finalmente o cadro baiés o que conseguíu encarrilar o partido no treito final. Outro dato interesante foi que se tratou do partido 200 do Baio na Copa da Costa, e case que 400 afeccionados se achegaron ao Pratas Reinoso para disfrutalo. Empezou o Corme moi forte, e Alejo adiantaba aos cormeláns tras un discutido penalti sobre Lucas, e mesmo puido facer o 0-2 pero o seu tiro pegou no pau. Foron minutos de control cormelán que se puido marchar no marcador, pero o gol de Porto nun córner abría de novo o parido. Na segunda, foi MC o home clave, aproveitando varios erros na defensa cormelán. Así, entre o minuto 52 e o 58 facía un triplete que deixaba sentenciada a eliminatoria. Recurtou Alejo pero a cousa quedaba moi lonxe e foi MC de novo o que completaba o seu póker de goles.  

Porteño* - Corcubión (1-1)

E outra eliminatoria decidida polo o valor doble dos goles fóra da casa. O Porteño pasa cun gol de Pejo e varias ocasións falladas nun choque no que soubo ler como estaba a eliminatoria. Tito empataba tras unha falta que puña Luís Lojo. Na segunda apretaron os corcubioneses que viron como Abelleira salvaba un par de contras claras. E na última xogada do partido Lema tivo o pase tras un novo centrazo de Luís, pero o balón non entrou.  

Máis información

• www.copadacosta.com.
• As táboas de resultados e clasificacións en www.futboldacosta.com. Piquen dende o seu teléfono e pulsen “Engadir a pantalla de inicio”, para ter sempre os resultados no peto.
• A actualidade no Facebook “Fútbol da Costa”.