O salón de actos do Concello de Malpica acolleu onte a presentación da VIII Carreira Pedestre do Concello de Malpica, un evento deportivo consolidado que se celebrará o vindeiro 27 de setembro.
A carreira terá tamén unha dimensión solidaria: por cada inscrición, a organización doará 1 euro á Asociación Española Contra o Cancro.
 

A proba, incluída no calendario oficial da Federación Galega de Atletismo, nace co obxectivo de fomentar a actividade física e deportiva como vía para acadar unha vida máis saudable e segura. A saída terá lugar na praza de Villar Amigo e a meta estará situada no paseo da Praia, logo de percorrer un total de 10 quilómetros nas categorías de adultos. Tamén se organizarán carreiras adaptadas ás categorías base, ademais dunha carreira de 2 quilómetros que discorrerá polo Porto de Malpica.

Durante a presentación, destacouse tamén o importante papel dos voluntarios, que actuarán como motivadores e protectores dos participantes.

A inscrición, que será única por participante, poderá realizarse desde hoxe mesmo ata o martes 23 de setembro a través da páxina web www.championchipnorte.com.
Cada persoa anotada será agasallada cunha camiseta conmemorativa da proba.

Trofeos da olería de Buño

Un dos aspectos máis singulares da proba será a entrega de trofeos elaborados artesanalmente en barro, cunha imaxe en 3D representativa da carreira, unha iniciativa coa que se pretende promover a alfarería tradicional de Buño. Ademais, como novidade nesta edición, as medallas das carreiras 2K entregaranse ao remate das mesmas, e o cartel incluirá un código QR que redirixe directamente á web de inscrición.