Ante as ducias de queixas dos veciños e veciñas de Malpica polos problemas co sinal de televisión, o concello xestionou a posta en marcha dun servizo telefónico no que se centralizarán todas as queixas para intentar determinar a orixe do problema e adoptar as medidas precisas para solucionalo. Grazas a este novo servizo, que entra en funcionamento despois de numerosas xestións realizadas polo alcalde, desde o goberno municipal agardan que poida poñerse fin ás deficiencias das que se veñen queixando varios veciños e veciñas. O problema comezou no ano 2015. A raíz das protestas recibidas, o alcalde de Malpica púxose en contacto coa dirección xeral de Medios, que enviou un equipo móbil para realizar medicións do sinal en distintos puntos do municipio. Segundo os datos recollidos nun informe que foi remitido posteriormente ao concello, o sinal chegaba perfectamente a todos os recunchos. Pero o problema continuaba, e desde a alcaldía continuaron a realizarse xestións ante os distintos organismos competentes para tratar de arranxalo. Froito desas xestións - tal como explicou o propio Eduardo Parga - desde a subdirección xeral de Enxeñaría e Planificación de Radio, Televisión e Multimedia vén de poñerse a disposición da veciñanza de Malpica o número de teléfono 881 866 388. É moi importante que todas as persoas afectadas chamen a este número, xa que canta máis información se recolla máis doado resultará adiviñar a orixe do problema e poñerlle fin. Novas relacionadas

• A TDT esquécese da Costa da Morte

Fonte

• Redacción QPC ([email protected])
• Concello de Malpica