Mércores. 18.05.2022
El tiempo

Os mellores actores de Galicia son da Costa

Os mellores actores de Galicia son da Costa
Pico e Victor Mosqueira mellores actores do teatro galego

Os XVII Premios María Casares xa teñen gañadores. O Teatro Rosalía Castro da Coruña vén de acoller esta noite unha cerimonia de entrega na que un total de 17 producións teatrais competían nas trece categorías nas que se dividen os galardóns do teatro, organizados pola Asociación de Actores e Actrices de Galicia (AAAG).

E aí estivo presente a Costa da Morte. Se ben partía Talía Teatro como unha das favoritas con 5 nominacións, a compañía ceense quedou sen premio. Pero si podemos loubarnos de ter os mellores actores de Galicia, unha vez que o esteirán Xosé Manuel Olveira "Pico" levou o premio ao Mellor Actor pola súa participación en Kafka e a boneca viaxeira, de Eme2, e mais o cormelán Víctor Mosqueira, levou o Mellor Actor Secundario por Galicia Canibal, de Filmanova Invest.

Unha gala que este ano comezaba con acento costeiro, pois non foi o outro que o ceense Toño Casais, Presidente da AAAG, o que abriu cun discurso. Á gala, que se retransmite en diferido pola Televisión de Galicia acudiron máis de 550 convidados, entre profesionais do sector, asociados, xornalistas e convidados en xeral. Todos eles asistiron ao espectáculo ideado pola compañía BaCaNa, cuxos actores Marcos Orsi e Xúlio Abonjo se encargaron de dirixir e conducir a cerimonia ataviados como os seus coñecidos personaxes Ratman e Bobyn, dous superheroes procedentes das cloacas que loitaron nesta noite contra un gran “supervilán”.

Batman en Robin nos Casares-Foto- Gabriel Tizon

Os premiados

Ao longo da noite déronse a coñecer os gañadores dos Premios María Casares de Teatro deste ano.

  • A produción Nuncabunga, de Elefante Elegante, levou o premio ao mellor espectáculo..
  • Tokio 3, de Voadora, conseguiu cinco galardóns: Mellor vestiario (Uxía P. Vaello), mellor iluminación (Baltasar Patiño), mellor música orixinal (Hugo Torres e José Díaz), mellor escenografía (Marta Pazos) e mellor dirección (Marta Pazos).
  • Viaxe a ningunha parte, de Sarabela teatro, levou tres premios: mellor adaptación-tradución ( Ánxeles Cuña), mellor maquillaxe (Raquel Fidalgo), mellor vestiario Suso Montero (compartido con Tokio3).
  • Pequenos actos pseudorrevolucionarios, levou dous premios: mellor texto) orixinal (Santiago Cortegoso) e mellor actriz (Marián Bañobre).
  • Galicia Canibal, de Filmanova Invest, un premio: mellor actor secundario (Víctor Mosqueira).
  • Kafka e a boneca viaxeira, de Eme2, 1 premio: mellor actor (Xosé Manuel Olveira Pico).
  • A función do Tequila, de Teatro do Morcego, mellor actriz secundaria: Luisa Merelas.

Discurso do Presidente, o ceense Toño Casais

O ceense Tono Casais presi da AAAG abrindo a Gala dos XVII Maria Casares

O presidente da Asociación de Actores e Actrices de Galicia (AAAG), Toño Casais, foi o encargado de dar á benvida a todos os asistentes a unha gala que, partindo do humor, tamén quixo reflexionar ao redor da situación cultural e social que atravesamos nestes momentos. Neste sentido, Toño Casais lembrou que o ano 2012 fora “moi duro para a profesión”, polo aumento dos “recortes nas axudas á produción e á distribución” , polos “atrasos nos pagamentos” e cunha moi notoria caída no número de funcións. “E cando pensabamos que todo o malo podería ter pasado xa, atopámonos cun 2013 absolutamente desastroso”, lamentou Casais, quen tamén subliñou o “paradoxal” que resultaba que este difícil 2013 sexa o ano no que as Letras Galegas están dedicadas ao dramaturgo Roberto Vidal Bolaño.

Un 2013 que, segundo Casais, estivo marcado pola parálise da Rede de Auditorios e de Teatro e polo tempo que a Agadic estivo sen dirección. O presidente tamén lembrou que a cultura “é un dereito” recollido no artigo 44 da Constitución e que “os poderes públicos han de poñela ao alcance de todos e todas”. No seu discurso, o presidente da AAAG explicou que dende 2010 “estamos asistindo a un desmantelamento absoluto das Artes Escénicas” e quixo aclarar que “unha cousa é apertarse o cinto e outra ben distinta é poñer unha soga ao pescozo”.

Casais tamén fixo un chamamento de unidade, xa que “entre todos podemos sacar adiante a situación”. “Pero antes teñen que deixar de vernos coma un problemal. Non o somos. En realidade, somos parte da solución”, apuntou Toño Casais ante as autoridades e antes de dar paso aos superheroes que presentaron a gala: Ratman e Bobyn, interpretados por Marcos Orsi e Xúlio Abonjo.

Manifesto do Teatro

O presidente da Asociación de Escritores en Lingua Galega (AELG), Cesáreo Sánchez, foi o encargado de ler o Manifesto Galego do Día Mundial do Teatro. A xunta directiva da AAAG decidiu elixir a Cesáreo Sánchez “como compañeiro de viaxe nun momento en que o papel que xoga a lingua resulta fundamental”.

“Se facemos memoria dos últimos corenta anos, a biografía do teatro galego é a biografía da cultura galega. No devir do teatro galego está insculpida a biografía deste pobo de noso”, explica Cesáreo Sánchez no seu manifesto. No documento, Cesáreo Sánchez tamén destaca que “o teatro fainos seres libres”.

Durante a gala, ademais, Pilar Pereira recolleu o Premio de Honra Marisa Soto. Deste xeito, o gremio escénico recoñeceu a súa longa e frutífera traxectoria artística que comezou hai xa máis de sesenta anos. Ao longo da súa carreira, a intérprete subiu aos escenarios de Galicia, España, Bélxica, Francia ou América Latina.

Máis información

Novas relacionadas

Máis novas

Fonte

comentarios