Tras alertar sobre os novos problemas no servizo de pediatría en Fisterra, o BNG vén de denunciar tamén a precaria situación do servizo de pediatría e atención primaria tamén en Muxía

O deputado do BNG da Costa da Morte, Oscar Insua, presentou varias inicitativas no Parlamento Galego lembrando que falamos dun problema casa estrutural, que afecta a toda a comarca dende hai anos.

Na vila do Cristo, os nacionalistas veñen de denunciar que non hai pediatra no centro de saúde debido á renuncia dunha facultativa logo da convocatoria dunha praza por concurso de méritos. Oscar Insua insta ás autoridades sanitarias “a que se cubra a praza de forma urxente antes do inicio do verán”. O BNG remarcou que “as autoridades sanitarias non establecen unhas condicións axeitadas para este tipo de postos de traballo de pediatría, e por tal razón prodúcense renuncias”. E subliñaron que nestes momentos a atención pediátrica das crianzas de Fisterra é derivada a Cee, “que conta cun servizo xa saturado”.

No municipio muxián, o BNG solicitou que o Sergas planifique mellor os recursos humanos para mellorar e garantir a atención primaria e o servizo pediátrico no centro médico, en especial durante os meses de verán, xa que non se están a cubrir baixas ou vacacións do persoal e iso conleva retrasos ou traslados do servizo a concellos limítrofes. Ademais, a formación nacionalista pide á Xunta que dote dunha base permanente de ambulancia no centro médico de Muxía “para evitar esperas excesivas na atención ás urxencias neste concello periférico”.

Oscar Insua denunciou “a incompetencia do goberno galego para dar solución a un problema que se vén producindo desde hai anos na nosa comarca”, e sinalou que “o PP fai promesas, sobre todo en épocas electorais, pero logo non cumpre e os cidadáns son os que teñen que sufrir as consecuencias da súa nefasta xestión”.