A Carreira das Areas triunfou un ano máis
09:05 25/08/11
Carnota acollía o pasado sábado, 20 de agosto, a tradicional Carreira das Areas, que este ano xa cumpría as dúas décadas. Atletas de distintas idades e categorías chegados dende diversas partes de Galicia, España e parte do estranxeiro déronse cita na praia de Carnota para compartir esforzo, percorrido e a ilusión de desfrutar dun espazo único.
O percorrido foi de oito quilómetros para as categorías Cadete, Sénior A, Sénior B, Veteranos e Superveteranos, e dous quilómetros para as categorías Benxamín e Alevín.
Madrugaron os participantes, xa que a saída dábase ás 10:30h na pasarela de Carnota. A dureza da proba e as súas dificultades estiveron recompensadas coa beleza da paisaxe, o entorno máxico e tamén con bens materiais, que viñeron máis que ben para coller folgos. Falamos dun exquisito roscón.
Repartíronse obsequios entre todos os participantes e un trofeo para os tres primeiros clasificados en cada unha das categorías. Os trofeos, da cerámica local de Nacho Porto, foron entregados polo concelleiro de Cultura e Deportes do Concello carnotán, Iván Franco.
Entre os participantes destacaron a boa organización do evento. Dende o equipo organizador amosáronse moi ledos xa que o número de participantes continúa a incrementarse ano a ano.
Novas relacionadas
- Mallou e Maceiras agardan pola súa Romaría da Cachelada.
- Atopan restos dunha ermida milenaria no Monte Pindo.
- Carnota fai balance do verán e prepara a Carreira das Areas.
- Carnota abre o prazo de inscrición para a Carreira das Areas.
- Quilmas erixiuse vencedora en Carnota.
- Pechou o Torneo de Tenis de Carnota.
Fonte
- Nota de prensa do Concello de Carnota.