O Barça conquista a praia de Nixeria con acento costeiro
Aló foron, a Nixeira, a disputar a Copa Lagos de Fútbol Praia, e voltaron como campións. Tres xorgadores costeiros forman un tridente no Barcelona, levando esta disciplina por todo o mundo. Desta volta era un torneo de exhibición, pero esta xente non se toma nada de broma.
Alí estiveron o pontecesán Ramiro Amarelle, probablemente o mellor xogador da historia deste deporte, o carnotán Miguel Beiro, e o coruñés pero moi coñecido no fútbol da Costa, Nico Alvarado. Os tres formaron parte da expedición culé en terras nixerianas.
Atopáronse con máis de 35º e unha humidade tremenda, pero a calidade é a calidade. E se ben o nivel dos equipos locais era moi alto en canto ao físico, técnica e tacticamente teñen marxe de mellora. Polo que chegaron e venceron os 3 partidos, con 2 goles de Amarelle e 4 de Nico. Esperaremos ao vídeo, que sairá a finais de mes.
Resultados da #CopaLagos
- Barcelona FC – Pespi Academic Team (PAC) (7-4)
- Barcelona FC – Stationery Stores FC (STS) (6-4)
- Barcelona FC – Enyimba International FC (ENY) (9-2).
Unha experiencia única
O propio Miki Beiro cóntanos que "era a primeira vez que xogábamos en África! A organización do torneo era moi boa, o que contrastaba ca situación que alí se vive". En todo caso, e malia que no lugar de concentración viviron momentos moi intensos e moi cercanos á poboación local, "por seguridade e por desgracia, pouco vimos da cidade".
En canto ao deportivo, recoñece que "ao ser un torneo amistoso, procurouse primar o espectáculo por diante do resultado". Pero para el é toda unha honra. "A nivel persoal, sempre é un pracer xogar con Nico e Rami, pasaron de ser eses cos que flipaba no verán vendoos na tele, a ser meus amigos, e poder xogar con eles no Barça. Creo que o fútbol Praia en España é o que é grazas a eles, e nunca se lle vai recoñecer".
Miguel e compañía queren aproveitar para agradecer ao Concello de Arteixo, que está botando unha man a parte do equipo cun campo permanente na Praia de Sabón.
Seguinte cita, en Barcelona
Xa están de volta en casa e iso que contaban con seguir de ruta co equipo pois estaba pendiente o Mundialito de Río, pero foi aprazado por problemas de organización.
De tódolos xeitos, en principio e case 100% confirmado, haberá un torneo internacional en primavera en Barcelona. De feito esta semana definese todo o calendario de 2015. E alí estarán os nosos representantes.
Aquí vemos como os nosos xogadores foron tratados como auténticas estrellas polas televisións locais (“só faltan os ceros na nómina”, valoran os protagonistas….):
Iso si, por Nixeira eran tan importantes as cheerleaders como os xogadores…
Máis info
Novas relacionadas
- O Barça de Fútbol Praia, cun tridente costeiro na Copa Lagos.
- Un pontecesán e un carnotán entre os Mellores do Mundo do Fútbol Praia.
Fonte
- Redacción de QPC ([email protected]).
