O Concello de Santa Comba xa repartiu as láminas nas que os escolares dos centros educativos do municipio plasmarán nun debuxo a súa idea sobre o poeta e xornalista local Pepe de Xan Baña, que viu a luz por primeira vez hai 150 anos na parroquia de Varilongo e despois foi un referente na emigración en Cuba.

As obras deben facerse na lámina que nestes días están a recibir os alumnos no seu centro educativo e hai que presentalas antes do día 25 de maio na casa de cultura.

O Concello vai entregar dous premios por categoría. Os gañadores levarán un lote de libros máis un bono por valor de 50 euros para realizar compras de material escolar nalgunha das librerías do municipio, e os segundos clasificados en cada categoría gañarán un lote de libros.
A entrega de premios terá lugar o próximo 2 de xunio, a partir das 12.30 horas, nun acto que se organizará no CEIP Plurilingüe Pepe de Xan Baña.

Concerto

Ademais, o concello invítano a estar "muuuuuuuiatentxs" porque o vindeiro 5 de xuño visita Santa Comba Xabier Díaz & Adufeiras de Salitre, un proxecto que encara 2022 con máis forza que nunca, con 10 músicos enriba dun escenario na procura de emocionar a un público no que sempre atopan complicidade.