Este pasado xoves Vimianzo recibía unha visita institucional comandada polo Delegado do Goberno en Galicia, Pedro Blanco. Un Blanco que tras reunirse coa rexedora Mónica Rodríguez amosou o seu interese por varios proxectos, como o de rehabilitación enerxética do Centro Social, ademais de loubar a importancia da colaboración e boa sintonía entre administracións.

Unha das visitas que máis impresionou ao Delegado foi ás instalacións da empresa Gerca, Acero y Metal, que xa supera os 100 traballadores. Pedro Blanco puxo en valor o traballo desta firma, centrada no sector da carpintería metálica e con máis de 25 anos de experiencia, da que indicou que é un referente industrial da Costa da Morte.
Da man dos directivos de Gerca, o delegado e a alcaldesa coñeceron os plans de expansión desta empresa, que se traduciron en investimentos que impactaron no Concello de Vimianzo. O delegado felicitounos por este crecemento que puxo como exemplo de bo facer empresarial.

Posteriormente, ambos os dous trasladáronse á Casa do Concello onde mantiveron unha reunión de traballo xunto con outros membros do Goberno local. Nesta reunión repasaron outros exemplos de colaboración do Goberno no municipio como a renovación das instalacións de alumeado exterior, a extensión da banda ancha e a dixitalización dos servizos públicos.

Máis novas