Máis rebaixas para ocupar o Polígono de Vimianzo
Desta volta é o Concello de Vimianzo o que trata de rebaixar os impostos ás empresas para intentar xerar movemento no Parque Empresarial de Vimianzo. Ese polígono que leva 5 anos baleiro, pero xa albisca a construción dunhas pistas de pádel.
O Concello vimiancés reduce o 95% do imposto ICIO ás construcións que se instalen no Polígono e aos agricultores e gandeiros. Así se publicou no BOP do luns 15 de setembro a Ordenanza Fiscal número 16, reguladora do Imposto sobre construcións, instalacións e obras. Nesta nova ordenanza prevense descontos do 40% do imposto para aquelas construcións, instalacións e obras declaradas de especial interese ou utilidade municipal. Esta declaración correspóndelle ao Pleno do Concello previa solicitude dos interesados.
Para as construcións, instalacións ou obras que se instalen no Polígono Industrial de Vimianzo e para as obras realizadas por agricultores/as ou gandeiros/as que queden afectas á actividade e cando a dita actividade supoña, cando menos, o 50% dos seus ingresos brutos, o desconto do imposto elévase até o 95%. Estes descontos supoñen un aforro medio por nave de 15.000 €.
Novas sobre o polígono
- 03-09-14: Un partido de pádel no polígono de Vimianzo.
- 08-08-14: O polígono de Vimianzo ponse de rebaixas.
- 31-01-14: A Xunta entrega unhas obras de abastecemento no baleiro Polígono de Vimianzo.
- 19-03-12: O Polígono de Vimianzo existe e unha empresa comeza a instalarse.
- 14-02-11: Os empresarios piden información sobre a situación legal do parque empresarial de Vimianzo.
- 21-03-10: O Goberno non cede cos prezos do Parque Empresarial de Vimianzo.
- 30-11-09: O parque empresarial pide auxilio.
- 15-04-09: Un parque empresarial sen empresas.
