Xa está no web da RAG a publicación no nº 39 da revista "Cadernos de Lingua" o artigo de Xosé Mª Rei Lema(licenciado en Filoloxía Galego-Portuguesa) titulado "Fraseoloxía da novela 'Costa do Solpor', de Xosé Mª Lema'".

Na presentación académica saliéntase que no traballo se rexistraron arredor de 950 frases feitas galegas, un número considerable, dificilmente igualable na narrativa galega actual e iso que o traballo fíxose tendo por base a edición reducida da novela, a que sacou en 2017 con 220 páxinas menos.

As expresións ofrécense ordenadas alfabeticamente, acompañadas da súa explicación e exemplos tirados da novela coa referencia da páxina correspondente. Entre elas destacan sobre todo as relacionadas co mar, xa que esta é unha novela de aventuras ambientada na costa coruñesa do século XVIII, dende a cidade herculina ata o cabo de Fisterra, unha situación xeográfica que tamén se reflicte a través das formas dialectais propias da costa fisterrá.

Expresións para cualificar o estado do mar como mar desfeito, ferver o mar, unha vaga de mar campal ou ventar un cifral; para referirse ao estado dunha embarcación (quedar ao garete, poñerse ao pairo, á valga, recoller o trapo...) ou para falar das actividades dos personaxes (andar ás crebas, andar ao corso, armar en corso...) son só algúns exemplos da pegada mariñeira na fraseoloxía que se atopan nunha ficción na que tamén abondan, entre moitas outras, as que indican cantidades (a centos, a eito, a embute, ás envorcadas, a esgalla, a pote, a regos...) e na que as distancias veñen marcadas por unha carreiriña de can ou diante dos fociños.

NOVAS SOBRE LEMA SUÁREZ

• Lema Suárez levou ao alumnado do IES Fin do Camiño pola Costa do Solpor.
• Actualizan na rede a Ruta Marítima da "Costa do Solpor" de Lema Suárez.
• “A onomástica da novela Costa do Solpor”, nas Actas do Simposio Estudos de Onomástica Galega II.
• Lema Suárez, Premio Sanmartiño por toda unha vida adicada á Normalización.
• Lema Suárez, Premio da Crítica de Creación Literaria.
• Cheo para descubrir a Ruta Costa do Solpor.
• A Costa do Solpor de Lema Suárez lidera o top-10 das obras narrativas galegas do 2013.
• Xosé María Lema trouxos os piratas de volta a casa.
• Lema Suárez estréase coa súa primeira novela de piratas “Costa do Solpor”.

ARTIGOS DE LEMA SUÁREZ EN QPC

• As outras coincidencias con Sicixia: Da lenda da Buserana á da Serea dos Mariño:
• A longa e teimosa loita polo Conxunto Etnográfico do Mosquetín.
• Case dúas décadas do recoñecemento oficial da Terra de Soneira no Mapa Comarcal de Galicia (I).
• Case dúas décadas do recoñecemento oficial da Terra de Soneira no Mapa Comarcal de Galicia (II).
• A vergonza do abandono, entre toxos e silvas, de catorce dólmens declarados BIC pola Xunta.