A dirección do Hospital Virxe da Xunqueira de Cee amósase satisfeita co balance dos resultados da actividade asistencial desenvolvida no primeiro semestre de 2014. Así nolo trasladaron aos medios nun comunicado tras a rolda de prensa acontecida esta mañá. Comunicado no que destacan que o número de usuarios en lista de espera para unha primeira consulta por enfermidade diminuiu (de 2.576 do ano pasado a 2.181 deste ano) e o tempo medio de espera sitúase en 37,5 días. Así mesmo, ao pechar o semestre, o tempo medio de espera para unha intervención quirúrxica en patoloxías con prioridade 1 reduciuse en máis de 7 días, pasando dos 11 días no primeiro semestre de 2013 aos 3,8 días no primeiro semestre deste ano en curso. Máis de 1.500 personas foron hospitalizadas neste primeiro semestre de 2014, cun tempo medio de estancia hospitalaria que ronda os 5 días. A actividade en urxencias incrementouse respeto ao ano pasado, sendo 7.821 usuarios os que atravesaron as portas do hospital para ser atendidos por unha emerxencia. No que a probas diagnósticas se refire, o tempo medio de espera para a realización, por exemplo, dunha proba radiolóxica convencional é de 12,8. En canto á realización dunha proba de TAC, é duns 10,6 días en 2014.