A Xunta vén de recibir 11 ofertas de empresas para a execución das obras de prolongación da autovía da Costa da Morte, no treito entre Santa Irena, no municipio coruñés de Vimianzo, e a estrada AC-432. O Goberno galego licita estes traballos por máis de 36 M€. 

Ademais, a Xunta recibiu 13 ofertas para o contrato de servizo para o control e vixilancia, seguimento ambiental e arqueolóxico, e coordinación da seguridade e saúde da obra, licitada por 1,3M€.

A nova intervención abrangue 5,8 novos quilómetros de estrada, ata a intersección coa AC-432, que comunica Vimianzo e Camariñas. Este treito construirase sobre unha traza con parte do movemento de terras xa executado.

As obras incluirán a construción de 2 enlaces e a previsión dun terceiro, 3 viadutos, 6 pasos superiores, 3 pasos inferiores e 6 obras de drenaxe. Cabe sinalar como estrutura máis singular do proxecto o viaduto sobre o río Vimianzo, que permitirá o cruzamento da vía sobre esta contorna, entre os puntos quilométricos  7+005 e 7+249.
 

Histórico da Autovía

• Xaneiro 26: PSOE e BNG critican o anuncio da Xunta da ampliación do Corredor "sen ruborizarse e sen pedir desculpas”
• Xaneiro 26: Anunciada a licitación da ampliación do Corredor entre Baio e Vimianzo, cuia posta en marcha se prevé para 2029
• Novembro 25: A Xunta afirma que o tramo de Corredor, non autovía, ata Vimianzo non estará listo ata 2029.
• Agosto 25: A Xunta porá unha rotonda no cruce de Berdoias.
• Outubro 25: Os Orzamentos da Xunta de 2026 recollen 8 millóns para a VAC.
• Outubro 25: O BNG urxe á Xunta axilizar o expediente para comezar canto antes as obras do corredor da AG-55.
• Xuño 25: Aprobado, tras 5 anos paralizado, o proxecto dos 5,5 km de Corredor ata Pasarela.
• Maio 25: O PP volve rexeitar no Parlamento acelerar a licitación do novo treito do corredor da Costa da Morte:
• Febreiro 25: A Autovía, a gran tomadura de pelo da Xunta do PP á veciñanza da Costa da Morte.
• Outubro 24: A Xunta lanza excusas sobre o Corredor pero ratifica que se executará ata Berdoias “nesta lexislatura”.
• Xullo 24: 7 Concellos aproban mocións para esixir á Xunta que remate a Autovía Costa da Morte.
• Maio 24: A Xunta evita concretar prazos para a activación das obras da Autovía.
• Maio 2024: O BNG reivindica desde Berdoias a ampliación da autovía da Costa da Morte.
• Novembro 2023: O BNG reitera a falta de execución de partidas que aparecen ano tras ano nos Orzamentos da Xunta para a Costa da Morte
• Outibro 23: Os Orzamentos da Xunta 2024 reducen a partida para a VAP
• Febreiro 23: A Autovía volve enredarse no Parlamento.
• Febreiro 23: A alcaldesa de Camariñas urxe á Conselleira a reactivación da prolongación da Autovía/Corredor ata Calo.
• Novembro 22: O pleno de Corcubión volveu pedir que se remate a Autovía e que se elimine a peaxe.
• Novembro 22: O PSOE Costa Atlántica lamenta a falta de compromiso dos Orzamentos da Xunta coa Autovía.
• Outubro 22: Os Orzamentos da Xunta inclúen, un ano máis, unha partida para o Corredor Baio-Berdoias.
• Agosto 22: Os socialistas esixen á Xunta que cumpla coas promesas do Corredor.
• Outubro 21: Os Orzamentos da Xunta para 2022 inclúen 3,43 millóns de euros para continuar o Corredor entre Baio e Berdoias.
• Maio 21: SEA e Goberno central reiteran que a conexión do Polígono de Vimianzo coa Autovía é responsabilidade da Xunta.
• Marzo 21: Reiteran a necesidade de rematar a Autovía ata Cee, ou polo menos ata Berdoias.
• Setembro 2020: Lembran os case 20 anos de promesas da Autovía Costa da Morte ata Brens.
• Febreiro 2020: Anunciada a ampliación da “Vía de Altas Prestacións”, con saída pero sen enlace co polígono de Vimianzo.