• A convocatoria deste ano está dotada con máis de 8 millóns de euros que servirán para apuntalar as exportacións galegas, que creceron case un 20% nos seis primeiros meses do ano
• O director do Igape, Javier Aguilera, destaca o récord de empresas exportadoras de xaneiro a xuño e subliña o apoio especial que se prestará ás compañías de Lugo, Ourense, Ferrolterra ou a Costa da Morte.
• Máis de 250 empresas galegas están xa a colaborar en 43 proxectos amparados polo Primex, que se están a desenvolver en 20 mercados estranxeiros
• As entidades interesadas poden presentar os seus proxectos ata o próximo 2 de setembro

A Consellería de Economía e Industria, a través do Igape, aposta polo Plan Primex como panca para apuntalar o crecemento das exportacións galegas, que nos seis primeiros meses do ano creceron preto dun 20%, colocando a Galicia como a segundo Comunidade Autónoma con maior crecemento do sector exterior en España. Co obxectivo de respaldar eses bos números, que levaron á balanza comercial galega a ter un superávit de 1.900 millóns, o Primex busca impulsar a internacionalización das pemes galegas a través da cooperación entre grupos de polo menos tres empresas. O director do Igape, Javier Aguilera, subliñou hoxe en rolda de prensa que a Xunta destina este ano máis de 8 millóns de euros a este plan, e animou ás empresas a inscribirse na convocatoria, que remata o vindeiro 2 de setembro. Aguilera destacou o récord de empresas exportadoras durante os cinco primeiros meses do ano, con máis de 4.000 entidades, a mellor cifra en máis dunha década. Precisamente, sinalou, dentro desas sociedades atópanse as máis de 250 empresas que están a cooperar en 43 proxectos de internacionalización ao abeiro do Plan Primex, implantándose en 20 mercados exteriores.