Unha camiñada para coñecer in situ o proxecto da mina de Corcoesto
12:01 12/02/14
O debate e a preocupación dos veciños polo que pasará coa mina de Corcoesto segue aberto na Costa da Morte, especialmente despois do acaecido nos últimos días ca balsa de acumulación de augas da mina Monte Neme.
O vindeiro sábado día 15 de Febreiro, a Plataforma pola defensa de Corcoesto e Bergantiños e máis a Asociación “Monte da Estrela” de Arteixo, organizan unha camiñada para percorrer o perímetro que marca o proxecto para a mina de Corcoesto.
As asociacións invitan a toda a cidadanía a que os acompañe neste percorrido circular duns 17 km para coñecer "in situ" o terreo que se vería afectado por esta actividade mineira para extraer outo a ceo aberto.
Membros da organización amosarán onde está previsto perforar a terra con dous buracos xigantescos para construír a planta de tratamento onde se faría a lixiviación do ouro empregando Cianuro. Camiñando entre carballos e castañeiros percorrerase o lugar onde está proxectada a acumulación de lodos ou as escombreiras.
O obxectivo desta camiñada é amosar sobre o terreo o perigo que correrían de desaparecer as fontes, árbores, valados, muíños, ou mesmo o río Lourido se se leva a cabo esta actividade mineira.
Ao parecer a empresa que planeou a obra está a traballar nun novo proxecto para esta zona, ainda que o pasado 15 de outubro a Xunta de Galicia non aprobou o primeiro dos proxectos presentados.
A camiñada partirá ás 10.30 da mañá da Carballeira de Santa Mariña.
