O PXOM de Cabana segue incluíndo o proxecto mineiro de Corcoesto

Cabana Costa da Morte

10:00 21/01/14

PXOM de Cabana-En vermello a zona do proxecto da mina de ouro de Corcoesto

Na semana na que a mina de ouro de Corcoesto chegou ao Parlamento Europeo, Alternativa Galega de Esquerda denuncia que o Plan Xeral de Ordenación Municipal (PXOM) de Cabana de Bergantiños, en exposición ao público, aínda inclúe o suspendido proxecto mineiro de Corcoesto, con este seguinte fragmento (páxina 56, apartado V. 4):
“As futuras e previsibles actuacións sobre o termo municipal, que poden ter uynha significativa incidencia socioeconómica e ambiental son alleas ao PXOM, trátase do solo industrial que contempla o Plan Sectorial de Áreas empresariais de Galicia e o Proxecto Industrial dunha explotación mineira en Corcoesto... En canto á explotación mineira de Corcoesto, que neste intre non conta coa autorización, no caso de que se acade, pode supoñer un impacto económico significativo, pero temporal, ao mesmo tempo, que ao igual que calquera explotación mineira, suporá un impacto ambiental. A avaliación destas duas variables, non sempre compatibles, permitirá adoptar decisións á administración autonómica”.

O deputado Antón Sánchez acusa ao PP de "manobrar para substituír a vontade popular polos intereses dunha multinacional depredadora, co asentimento da Xunta".
“A maiores, vulnérase manifestamente o artigo 165 da Lei de Ordenación Urbanística de Galicia, ao cualificar os terreos de sistema xeral, como se fose unha infraestrutura ou unha dotación pública”, engade o parlamentario de AGE. A mencionada norma di no seu artigo 165:
“Son terreos de sistemas xerais os dotacionais públicos que están deseñados ou previstos para o servizo da totalidade do municipio e, en especial, para implanta-las infraestruturas básicas do modelo de cidade”.

Esquerda Unida pide a paralización de calquera tentativa de abrir a mina

Tamén falou do asunto o deputado de IU Willy Meyer, que actuou de presidente da comisión de peticións celebrada onte en Bruxelas, considera que a pesar da palabra dada pola Xunta de “non autorizar a mina en Corcoesto” “por se acaso” sería bo establecer medidas legais para evitar que no futuro aparezan proxectos neste lugar ou noutros.
Esquerda Unida considera que a intervención do eurodeputado galego Millán Mon, “non despexou a posibilidade de instalación da mina en Corcoesto e simplemente remitiu a posibilidade da mesma ás autorizacións ambientais precedentes".

O BNG tamén no Parlamento Europeo

Foron Ana Martina Varela, en representación da Asociación “Petón do Lobo” e Francisco García Trigo, en representación da “Plataforma en defensa de Corcoesto e Bergantiños, os que presentaron a pregunta no Parlamento Europeo. Pero ante a imposibilidade de asistir, presencialmente, delegaron a súa defensa na ex eurodeputada Ana Miranda. Así, o BNG apoiou, a través do eurodeputado Iñaki Irazabalbeitia, actual eurodeputado da coalición “Europa dos Pobos”, integrada no Grupo Verdes-Alianza Libre Europea/ALE, que as denuncias dontra a DIA fiquen abertas no Parlamento Europeo ate que a Xunta paralice definitivamente o proxecto, pois a día de hoxe, “só é unha declaración de intencións feita polo Presidente da Xunta”, denuncia Ana Miranda.