Os servizos municipais de Carballo contan con kits de adrenalina para tratar picaduras de avespa asiática

08:10 10/08/18

Os kits usaranse no caso de que sofran un shock anafiláctico como consecuencia da picadura dunha avespa Os tractores municipais que realizan os labores de roza, o vehículo empregado polos xardineiros municipais, o da brigada de medio ambiente e os da Policía Local e Protección Civil do concello de Carballo contarán entre o seu equipamento, a partir de agora, cunha dose de adrenalina inxectable en xiringa precargada e un aerosol contra velutinas. O obxectivo do concello carballés con esta medida é aumentar a protección dos/as traballadores/as, así coma facilitar o traballo dos servizos de seguridade no caso de que se atopen no seu labor diario cunha emerxencia relacionada con picaduras de avespas. O kit de adrenalina utilizarase no caso de que algunha persoa sufra un shock anafiláctico coma consecuencia da picadura dunha avespa. Deste xeito disporase dun tempo de marxe ata que a persoa afectada reciba asistencia sanitaria. Desde o servizo municipal de control de pragas insístese unha vez máis na conveniencia de extremar as medidas de precaución, sobre todo por parte das persoas que traballan nos sectores forestal e/ou agrario, xa que este ano estanse dando moitos casos de picaduras. Unha das causas é que as avespas cambiaron os seus hábitos e fixeron niños en lugares insospeitados, coma unha pedra ou un pé de millo, polo que é máis posible invadir o seu territorio e que respondan cun ataque. Por iso hai varios consellos que é convinte seguir. Antes de empezar a traballar débese realizar un recoñecemento da parcela para comprobar que non existen niños. É frecuente que aparezan entre as silveiras. No caso de que se atope un niño de velutina recoméndase non achegarse a el e menos tocarle xa que se sentirán atacadas. Neste caso débese chamar ao 012 ou ao 112 para que acudan a retiralo. No caso dun ataque débese fuxir o máis rápido posible e refuxiarse nalgún lugar pechado coma o coche así como protexer a cara e a parte de atrás do pescozo (teñen tendencia a picar nesa parte do corpo) e non facer movementos bruscos. Se a atacada é outra persoa non achegarse a ela e chamar rapidamente ao 112. No caso de ser alérxico débse levar sempre a medicación precisa.