A gran protagonista da fin de semana en Carballo é a Danza, pero hai moitas máis cousas. Repasamos a axenda

Libros de poesía e Deportivismo

Hoxe xoves hai cita poética en Espiral Maior Foro e mañá venres cita no Casino1998 co deportivismo.

Primavera enDanza

O programa Primavera enDanza trae 3 sesións para esta fin de semana.

Hoxe xoves 27, ás 20:00h no Pazo da Cultura, empeza o ciclo cun faladoiro de Paula Quintas que fará un percorrido histórico pola linguaxe desta arte.

A propia Quintas, bailarina, artista circense, coreógrafa, pedagoga e xestora cultural, abrirá o ciclo de actuacións o venres 28 de marzo, ás 21:00h, coa estrea absoluta de Aurora Boreal, cuia preparación se está desenvolvendo no propio Pazo como residencia.
O público terá a oportunidade de vivir un momento único, que se presenta como unha metáfora visual e emocional do noso propio paso polo mundo, da man de dúas excelentes creadoras e autoras, Paula Quintas e Rut Balbís. Será o venres 28 de marzo ás 21.00 horas no Pazo da Cultura. A duración prevista do espectáculo, dirixido a público adulto, é de 50 minutos. O prezo da entrada é de 5€, 3€ con prezo reducido. Colabora a Rede Galega de Teatro e Aditorios.

Xa o sábado chega a Carballo outra proposta galega, da man de Marta Alonso e Sofá. A Marta e a Pablo, que se coñeceron bailando, vanlles máis as tardes de sofá e danza. Esta cita é o sábado 29 de marzo ás 20.30 horas no Pazo da Cultura. A duración prevista do espectáculo, dirixido a público adulto, é de 70 minutos. O prezo da entrada é de 7€, 4€ con prezo reducido. Colabora a Rede Galega de Teatro e Aditorios.

As entradas para todos os espectáculos están á venda en a un prezo moi asequible. Tamén será posible a venda directa o mesmo día do espectáculo na billeteira do Pazo da Cultura dende 90 minutos antes da actuación. Ademais, hai que lembrar que están dispoñibles BONOS que inclúen as cinco propostas de Primavera enDanza a un prezo ordinario de 20€ e a un prezo reducido de 15€.

“Carballo na memoria”

O proxecto Carballo na memoria toma impulso de novo para seguir recuperando, catalogando e protexendo todo tipo de material fotográfico, audiovisual e mesmo sonoro que forman parte da nosa historia. Para iso invita a veciñanza a rescatar fotos vellas (vídeos ou sons tamén) do caixón da cómoda que leva anos sen abrir e levalas este sábado 29 de marzo á parroquia de Razo. O traballo de recompilación realizarase a partir das 11.00 horas no centro social, e estenderase ao longo do día o tempo que sexa preciso en función das achegas.