Duras foron as condicións meteorolóxicas coas que se atoparon os 316 participantes no V Trail Monte Pindo, organizado pola Asociación Monte Pindo Parque Natural. Destes, un total de 280 conseguiron rematar a proba. O evento, que tivo lugar o pasado sábado 13 de xuño, comezou nunha tarde de ceos cubertos; máis a climatoloxía foi cambiando a medida que os participantes ascendían os 627 metros que os separaban do punto de partida. Segundo ían gañando altura os participantes atopáronse cunha mesta néboa de choiva e ventos, máis propios do inverno que duns días previos ao inicio do verán. Desta forma, á dureza da probra sumáronse as adversidades do tempo que provocaron que o chan estivese especialmente esvaradizo (sobre todo nos tramos de granito). En canto aos tempos, Luis Calvo Castro (Negreira), Luis Martínez Comesaña (Nigrán) e Samuel Saborido Soñora (Dodro) completaron o percorrido en dúas horas e dez minutos, cunha diferenza duns 30 segundos, entre cada un deles. O primeiro clasificado da Costa da Morte foi o vimiances Damian Espasandìn, de DAFIT entrenamento persoal, que acadou un meritoio 31 posto. Segundo informan dende a organización, a proba contou cunha alta participación feminina. A mellor clasificada foi a coruñesa Almudena Suárez Pazos, 58ª na xeral cun espectacular tempo de 2 horas e 50 minutos, sendo a primeira veterá a viguesa Margarita Beiro González; mentras que o terceiro posto desa categoría para a ceense Belén Pérez Martínez. O primeiro veterán masculino foi o redondelán César Santos Barciela, que conquistou nada menos que o oitavo posto da xeral. Dentro dos corredores locais, salientar a magnífica participación dos Praia de Carnota Runners, equipo amateur conformado por unha ducia de veciños da contorna carnotá, que lograron situarse en torno ao posto cen e por debaixo das tres horas, tempos absolutamente brillantes tratándose da xa considerada proba raiña dos trails galegos e non sendo profesionais. O resto dos resultados pódense consultar aquí. Os premios a todos eles, obra do artesán local Nacho Porto, foron entregados en nome de GMTA José Moutinho, en nome de Monte Pindo Parque Natural Mario Maceiras e polo alcalde de Carnota Ramón Noceda, reelixido como tal esa mesma mañá.

Novas relacionadas

• O Monte Pindo prepara o seu Encontro
• O Trail Monte Pindo, o máis duro de Galicia
• O Monte Pindo terá dous trails este verán.
• O Encontro do Monte Pindo xa espera polo seu Trail.
• 7 heroes completan o Ultratrail Camiño dos Faros.
• O Monte Pindo volverá acoller unha das 6 probas da Galicia Máxica Trail Adventure.
• 2013: A rabiosa natureza foi a protagonista do Encontro Monte Pindo.
• 2012: Un millar de persoas encontráronse no Monte Pindo.
• 2011: O Monte Pindo disfrutou dun Encontro con historia, música, gastronomía e deporte.
• 2010: A Pedramar achegou o Monte ao Pindo.
• II Simposium Monte Pindo: Por que temos que coidar o Monte Pindo?.