Coeducación para visibilizar os micromachismos

Coeducación para visibilizar os micromachismos

20:30 15/12/14

Recollíamos este 26 de novembro unha marea de accións relacionadas co Día Internacional contra a Violencia de Xénero. Detiñámonos especialmente nunha, por novidosa, e hoxe podemos completala. Falamos do Obradoiro de micromachismos levado a cabo polo BNG Costa da Morte en Carnota, que vén de facer un traballo completísimo e que nos envía un vídeo coa curiosa proxección animada que se realizou aquela noite do 21N.

O colectivo de mulleres nacionalistas da entidade, sabe que a violencia machista non é só o número de mulleres asasinadas cada ano. Son moitas máis, moito máis invisibles, as cousas que se dan cada día na nosa sociedade. E por iso, centrou a actividade nos “micromachismos, a violencia invisíbel que nos rodea e que son parte desta lacra que temos que frear, con accións coma estas, e por suposto, nas institucións, xa que a violencia machista non é unha cuestión privada, é unha cuestión pública e política”.

Teñen claro que a solución “está nas nosas mans”, por iso apostan pola educación. Como a vivida aquela noite na taberna carnotá do Bar Pedrapás, que viron este vídeo “O soño imposible”, un vídeo realizado a Organización das Nacións Unidas no ano 1983. A pregunta clave foi: “Credes que en 31 anos cambiou algo?”

Bo exercicio o de volta atrás no tempo. E parece que a día de hoxe “a desigualdade de sexos e o modelo de familia patriarcal na sociedade actual no occidente” segue sendo unha realidade.
As inmediatas solucións que propuxeron maioritariamente, despois de moito debatir ata ben entrada a madrugada, centráronse na “educación en igualdade desde as escolas infantís ata a universidade, políticas que nos axuden a emanciparnos e concienciación social nos fogares e na veciñanza”.