Acolleu este xoves a Galería Stoupa de Cee unha nova “Xornada de Artesanía da Costa da Morta". Acodiron á cita vicepresidenta da CMAT, María Lema, o presidente de APTCM Pepe Formoso, e un grupo de empresarios de Costa da Morte que quixeron participar na exhibición: Hotel Meiga do Mar, BelaFisterra, BelaMuxía, Hotel Boutique Mar do Ézaro, Nemiñarea, Arrueiro.

Esta xornada formou parte das accións de divulgación da artesanía de Costa da Morte por parte da CMAT e tiña como obxectivo poñer en valor o traballo da artesanía local e crear sinerxias entre o tecido empresarial do sector turístico e os artesáns do noso territorio. A actividade estivo distribuída en dous obradoiros.

Primeiro, o Fran Gorín fixo unha “Demostración ao Torno de Olería de Buño”, mostrando a Olería de Buño como a artesanía con máis historia da Costa da Morte, dándolle valor ao proceso de elaboración (deseño, decoración, secado, cocción…) das pezas de barro de Buño desde a súa creación ata a súa saída ao mercado.

De seguido, Begoña Fernández Paz, responsable de Stoupa falou da “Artesanía da Restauración", apostando pola creación de propostas de decoración adaptadas e exhibición de pezas de madeira, cerámica, cestería e téxtiles de artesáns da Costa da Morte que traballan con mobiliario, vaixelas, pezas ornamentais e demais elementos para utilizar no mundo da restauración e a hostalería vinculada ao sector turístico do territorio.