Unha maqueta moi especial para o Museo Fernando Blanco
Ven de recibir a Fundación Fernando Blanco de Lema un agasallo moi especial. O señor José Manuel Marcote Caamaño fixo entrega á entidade ceense dunha fermosísima maqueta que reproduce o edificio da antiga Escola das Nenas (sede do actual Museo Fernando Blanco), a cal doou de xeito totalmente altruísta e desinteresado. Unha peza que se suma a todos os Tesouros da Fundación.
Perfectamente policromada, a réplica do inmoble, inaugurado no 1887 e ampliado no 1914, está elaborada completamente a man, empregando para elo chapa mariña e madeira das canas das bombas de palenque.
A maqueta doada ao Museo é unha auténtica obra de arte e conta cun gran nivel de detalle en todos e cada un dos elementos que a conforman, destacando ademais das distintas partes do edificio (portas, ventás, zócalos, cornixas, cuberta...), o parque infantil da parte posterior (antigo patio de recreo da escola) no que non faltan as árbores e os distintos aparellos de xogos.
A obra doada quedará exposta no Museo para todos aqueles que queiran vir vela e admirala.
O señor José Manuel Marcote Caamaño, que conta con 83 anos, naceu en Estorde (Cee) e é veciño da Armada (Cee). Toda a súa vida profesional estivo dedicada á albanelaría, primeiro aquí, logo once tempadas nos cantóns de Thurgau e Lucerna en Suíza, para finalmente xubilarse na súa localidade natal. Sempre tivo como afección a pesca, pero a raíz do confinamento descubriu o que hoxe é o seu principal pasatempo (a talla da madeira) ao que deica o seu ben merecido tempo libre.
Como nos contaba orgulloso, comezou coa elaboración dunha pequena chalana, logo fixo a maqueta da súa casa da Armada, da igrexa de San Adrián de Toba, do cabazo que se atopa no Recheo de Cee, e ven de rematar a peza coa que nos acaba de obsequiar e que o tivo atarefado 6 meses.
Pero o señor José Manuel, meticuloso e perfeccionista, non ten “parada” e está xa embarcado nun novo proxecto, de maiores dimensións, e ligado tamén, curiosamente, á Fundación: unha reprodución do impoñente e centenario Instituto Fernando Blanco.
Dende a Fundación Fernando Blanco queren agradecer a súa doazón e, sobre todo, "o cariño que sabemos que o señor José Manuel puxo na elaboración da réplica dun inmoble que forma parte da historia recente da nosa localidade."
