Nova folga indefinida das traballadoras da limpeza do Hospital
![](/asset/thumbnail,992,558,center,center/media/quepasanacosta/images/2011/10/05/O-sector-de-limpeza-do-HVdX-en-loita-cada-mercores.jpg)
![O sector da limpeza do HVdX en loita cada mercores](/media/quepasanacosta/images/2011/10/05/O-sector-de-limpeza-do-HVdX-en-loita-cada-mercores.jpg)
As traballadoras do servizo de limpeza do Hospital “Virxe da Xunqueira” de Cee continúan adiante co calendario de mobilizacións en demanda da equiparación salarial ao Grupo E do Sergas, "un dereito que xa ten recoñecido o persoal de limpeza na maioría dos centros hospitalarios do país", segundo denuncia a CIG.
Nesta ocasión, e segundo denuncia o sindicato, "por mor do inmobilismo amosado pola nova empresa adxudicataria, Limpisa Grupo Norte, e a propia Xerencia", as traballadoras convocaron folga indefinida a partir do 23 de xaneiro, que afectará a todo o cadro de persoal e a todas as quendas de traballo (mañá, tarde, noite e partida).
Dende a CIG lémbrase que "hai xa máis de dous anos que a parte social vén mantendo conversas tanto coas empresas concesionarias do servizo como coa Xerencia do Hospital comarcal, sen que até o momento se producisen avances na apertura dunha mesa de negociación para acadar un convenio de centro que permita a equiparación co grupo E do Sergas". E iso, a pesar das mobilizacións realizadas polas empregadas/os que incluíron a convocatoria de paros parciais durante o pasado mes de novembro.
A CIG denuncia que "a empresa e Xerencia néganse sistematicamente a reunirse de xeito conxunto coa representación das traballadoras/es e mesmo o compromiso acadado cos responsábeis do centro (antes do cambio de empresa) foi incumprido".
Novas relacionadas
- 02-11-11: Máis paróns na limpeza do Hospital.
- 05-10-11: “Xerencia escoita, limpeza está en loita”.
- 30-05-11: A CIG pide a equiparación salarial dos traballadores da empresa de limpeza do HVdX cos do SERGAS.
Fonte
- Nota de prensa da CIG-Cee.