O BNG de Cee critica que o alcalde contrate publirreportaxes na prensa

Cee

10:37 08/03/11

Denuncian hoxe dende vo BNG ceense que "o alcalde Ramón Vigo está enchendo os xornais de publireportaxes nos que presume da súa xestión". O BNG de Cee "reproba totalmente que o alcalde utilice os cartos de todos os ceenses para tratar de limpar a súa imaxe, despois de ser imputado por 7 causas na Operación Orquestra". Así, afirman que "se quere facer publicidade partidaria que a pague do seu peto" e denuncian que "é inadmisible e fraudulento que o alcalde utilice o seu cargo e os cartos do concello para facer campaña para as vindeiras eleccións municipais". Destacan dende a oposición que "o gasto en publicidade do goberno de Cee é disparatado", e lamentan "ver como novamente o PSOE de Cee, coa vicealcaldesa á cabeza, aproba esta dilapidación dos cartos de todos os contribuíntes ceenses". E nesa liña de dilapidación repasa o gasto en soldos políticos: "O actual Concello é o máis derrochador da historia. Con tres soldos políticos máis o da secretaria persoal do alcalde (un posto que nunca existira en Cee) que supuxeron máis de medio millón de euros nestes 4 anos".

Propostas de aforro

Así, o BNG propón medidas de aforro fronte ao goberno “derrochador” de IxCee e PSOE. No pleno do vindeiro venres 11 trataranse dúas destas iniciativas:

Proposta para aforro enerxético. Centrada na eficiencia energética dentro do Concello.
Proposta para cesión do Centro de Saúde á Xunta de Galiza mediante o acordo vixente xa dende o ano 2008, entre a FEGAMP e a Consellería de Sanidade.

A estas propostas hai que sumar outras anteriores:

Proposta sobre autocompostaxe doméstica, aprobada por unanimidade no último pleno. Instalaranse nunha primeira etapa piloto 50 composteiros caseiros.
Atenuación do alumeado público en franxas horarias nocturnas e en zonas despoboadas.
Instalación de paneis solares nos edificios públicos para o seu autoabastecemento e para venda da enerxía sobrante á rede (fonte de ingresos para o Concello).