A Asociación Organizadora do Mercado Medieval báixase do barco
A apenas mes e medio do evento, e apesar das verbas que nos trasladaban a semana pasada, a Asociación Organizadora do Mercado Medieval de Corcubión anuncia que "a XX edición do ano pasado (2022) foi a derradeira festa medieval que organizamos nós".
Tras 12 anos e 10 edicións á fronte da organización da festa, recoñecen un "cansazo acumulado que fai que decidamos tomar esta “difícil” decisión".
Non queren vincular o Mercado coa política, pero tras máis de 10 meses do remate da anterior edición, anuncian hoxe, unha semana despois do cambio no goberno municipal provocado polas eleccións municipais, o seu abandono. De feito, no mesmo comunicado que lanzan esta tarde de venres entenden que "ao abrirse un novo ciclo político en Corcubión, é o momento adecuado para que outras persoas tomen a iniciativa e collan o noso relevo".
Quédalle agora un papel complicado ao novo grupo de goberno, pendente ademais da resolución do voto pintado para saber cando se vai realizar a investidura, e pendente se volve haber un grupo de traballo (por exemplo aquel que arrincou a festa e que se mantivo durante 10 anos) que queira asumir a organización, cun mes de prazo, para organizar o evento. Queda solicitada a subvención da Deputación para o Desembarco, e a petición de ser catalogado como Festa de Interese Turístico Galego.
En calquera caso, cómpre valorar o traballo deste grupo de veciños e veciñas que mantiveron viva unha fermosa e auténtica festa.
Ollo que a festa vaise celebrar a fin de semana do 21, 22 e 23 de xullo, coincidindo coas Eleccións Xerais...
MÁIS INFO
CRÓNICAS DOS MERCADOS
- 2022: O Mercado Medieval de Corcubión cumpliu 20 anos para cambiar de ciclo.
- 2019: O Mercado medieval de Corcubión en imaxes.
- 2019: Corcubión e o seu pobo, por riba das modas medievais.
- 2018: Corcubión volve ao medievo con máis forza ca nunca.
- 2013: O Mercado Medieval de Corcubión mantén o seu tirón.
- 2012: O Mercado Medieval de Corcubión non perde tirón.
