30 mulleres xa forman parte do proxecto #TodasNós
Xornalistas, psicólogas, logopedas, enxeñeiras, arquitectas, ilustradoras, escritoras, representantes políticas, sociólogas, avogadas, emprendedoras... Toda clase de profesionais forman parte xa do proxecto Todas Nós, un proxecto de visibilización da cantidade e calidade profesional das mulleres rurais da Costa da Morte. Son 30 as xa adheridas nesta primeira onda, pero Patricia Vaquero, a promotora da iniciativa, espera que se vaian apuntando moitas máis. “Seguro que unhas chaman polas outras”, apunta.
”O para que principal é o de visibilizar, que aquí hai moitas mulleres que están aportando moito valor ao noso territorio”, explica, pero a partir de aquí virán moitas máis cousas.
Xa está activo un completo directorio con todas estas mulleres, “todas distintas, pero todas iguais nas ganas de compartir, tecer redes, colaborar, visibilizar e por en valor o noso traballo, o noso talento”. Son dous os directorios xerados: Todas Nós, destinado a mulleres profesionais ou emprendedoras que naceron ou viven nalgún concello da Costa da Morte e que teñen mais de 5 anos de experiencia profesional; e A Incubadora, destinado a mulleres mozas recén graduadas ou con menos de 5 anos de experiencia profesional, do que xa forman parte 4 profesionais.
En calquera caso, os directorios, de feito, “só son o principio, unha parte pola que comezar a coñecernos e poñernos cara, pero estamos xa xerando novas accións que permitan seguir aportando valor e visibilizando o aporte individual e colectivo das mulleres da Costa da Morte”, explica. “Queremos seguir fomentando a creación de redes, comunidade e colaboración”.
Para isto, toca dinamizar accións. “Se o COVID o permite, a idea é facer unha presentación presencial, con todas as que poidamos, para coñecérmonos e escoitar que necesitamos a nivel individual e tamén colectivo. Mentres, estamos traballando para facer formacións, e en breve abriremos un grupo de Telegram para estar conectadas entre todas”, cóntanos Vaquero.
O proxecto está continuamente aberto e podes incorporarte cubrindo un simple formulario ou poñéndote en contacto coa promotora.
