A man culpable do alcalde de Coristanco

09:14 24/03/15

Segundo a última proba caligráfica realizada polo Xulgado, parece ser que foi o mesmo alcalde, Antonio Pensado Plágaro, o que escribriu da súa man un escrito alentando aos veciños a mobilizarse contra unha empresa e favorecendo a outra, incorrendo así nun suposto delito de prevaricación.

Unha nova proba que implica a un alcalde en contra dos seus veciños, e que terá que explicar no vindeiro pleno do último mércores de mes ás 9:00h pois TeGa vai presentar unha moción de urxencia.

E o fai ante “a grave situación e presunta corrupción total que estamos vivindo no concello de Coristanco”. TeGa pedirá a urxente aclaración dos feitos así como a dimisión inmediata do alcalde, tanto “polas gravedades do asunto como polo trato partidista e de favoritismo que tivo en todo este proceso”.

A maiores, lembram que “o alcalde presuntamente mentiu na súa declaración ante a xuiza, o cal da indicios da maneira que ten de colaborar coa xustiza”.

O BNG tamén estará no pleno

Ademais, o BNG tamén presentará, para o pleno do próximo mércores, unha batería de preguntas relativas á situación do Concello de Coristanco e a súa parálise e funcionamento caciquil. O BNG preguntará polo estado do Plan Xeral, do que “non se deu ningún tipo de información nos dous últimos anos, a pesar de ser un tema de capital importancia”.

Tamén, polos “expedientes abertos á secretaria municipal, que se acumulan, o que demostra a politización deste asunto e os escuros intereses do alcalde”. E, nunha liña parecida, o BNG volverá preguntar tamén “polas acusacións de tramitación discriminatoria de expedientes urbanísticos, unhas denuncias que parecen ir na liña do coñecido esta fin de semana a raíz da proba caligráfica ao alcalde, onde parece constatarse que, por desgraza, neste concello, non todos/as somos iguais”.