Venres. 29.03.2024
El tiempo

Belén Vila, de Frutas Belén: "Ao pecharme tanto as feiras coma os bares, levo na casa practicamente vinte e pico días"

Posto de Embutidos J.A.M.MONT no mercado dominical de Cee.
Posto de Embutidos J.A.M.MONT no mercado dominical de Cee.
Belén Vila, de Frutas Belén: "Ao pecharme tanto as feiras coma os bares, levo na casa practicamente vinte e pico días"

En QPC vimos de recoller varios testemuños de diferentes sectores afectados directamente por esta crise sanitaria como os taxistas, a hostalería ou a pesca artesanal. Nesta volta centrámonos naquelas pequenas empresas de alimentación de venda ambulante que, a pesares de pertencer ao sector de primeira necesidade, víronse gravemente afectados pola cancelación das feiras, o seu principal sustento.

Belén Vila, de Frutas Belén, afirma que dende que se decretou o Estado de Alarma as súas vendas descenderon seriamente por mor do peche das feiras e bares: “Ao pecharme tanto as feiras coma os bares, levo na casa practicamente vinte e pico días, teño todo pechado. Si fago algún encargo para quen me chama, pero nada”.

Vila indica que xusto o xoves 12 de marzo, dous días antes de que se declarase oficialmente o Estado de Alarma, cargou o seu camión cunha mercancía que tivo que tirar finalmente nos días posteriores ao non poder vendela. “Ese venres fun á feira a Fisterra e tan pronto chegamos o municipal xa nos dí que a partir de hoxe e ata novo aviso non habería mercado. Entón toda a mercancía, as verduras, fresas e iso, tiven que tirar con todo porque xa non houbo unha saída”, explica.

Camion frutas belen

Un dos problemas que viu é que a xente principalmente cegouse en comprar nos supermercados sen pensar en outras alternativas. “A xente pensou que se acababa o mundo e abalanzouse a todo no super. De feito eu fun ao super despois ese luns e as estanterías estaban todas baleira e díxenlle á dependenta, vós tedes todo isto baleiro e eu cun camión de froita na casa para tirar”, declara Vila.

Nestes momentos está intentando repartir a todos os clientes que lle encargan a pesar de que o volume de vendas non é o mesmo. “Eu teño algúns clientes que me chaman e repártolles pero ao mellor de 100 clientes que tes, chámanche 5. Despois, o que fago é que espero todo o día e vou repartir a última hora da tarde para intentar xuntar un 4 ou 5 encargos e non ir con un só”, explica.

Por outra banda, Manuel Franco, de Embutidos J.A.M.MONT, tamén afirma que se encontra na mesma situación. “ Nós estamos practicamente parados ao 100% ao cortarnos as feiras, que é onde tiñamos nós o noso punto de venda”, indica.

Ao igual que Vila, Franco está a servir algúns dos encargos a particulares, sempre e cando sexan de cerca. “Eu tiña clientes a 100 quilómetros, en Ordes, en Santa Comba... E claro, agora a eses clientes non podo servilos, non podo levarlle un quilo de chourizos a un cliente a 60 ou 70 quilómetros. En cambio aquí, en Fisterra, Muxía, Cee... Esta zona si que a estou cubrindo, pero tan só a quen me chama”, comenta Franco.

Agora, con todo isto, a variedade de produtos que está a vender é moito menor que nas feiras, dado que, segundo indica, “se ti vas á feira, ves todo posto e sempre picaban un chourizo especial de León, un anaquiño de cecina... Iso agora nada, pídenche o básico: queixo, un taquiño de xamón, lomo de freír, chourizos para cocer, mel...”.

Camión do reparto de Embutidos J.A.M.MONT

Ante unha situación coma esta pensar nunha solución clara é complicado, mais para Franco, algo que podería axudar a impulsar os negocios de alimentación ambulante sería lles desen a posibilidade de realizar as mesmas rutas habituais. “Eu penso que a alimentación tiña que poder circular igual como circulaba antes tomando as precaucións pertinentes, con mascarillas, coa marxe de distancia, non poder tocar... Pero que poida acceder aos sitios. A según poden as grandes superficies coma os supermercados, pois tamén poidamos os feirantes”, afirma Franco.

Tanto Vila coma Franco coinciden en que as previsións dun futuro próximo non son boas e teñen claro que isto vai ser progresivo. “O problema é que isto nos afecta a todos e á larga isto vai traer unha crise criminal. Eu no meu caso poderei aguantar uns meses, pero hai moitos negocios que non son capaces de facelo e eu penso que algúns que xa non van poder abrir cando poidan”, explica Vila.

Franco, pola súa parte, entende que un dos sustentos da nosa zona é o turismo, cousa que será verá nun estado moi crítico nos meses vindeiros. “Se non hai turismo e non hai cartos na zona, pois obviamente non se van mover cartos nas feiras nin en ningún sitio. A cousa vai comezar a funcionar? Si, pero moi amodiño”, afirma.

Comentarios