A asemblea comarcal do BNG de Bergantiños vén de aprobar por unanimidade a candidatura de Ana Pontón á presidencia da Xunta. A portavoz nacional do BNG conta co respaldo absoluto da militancia da comarca, que ateigou a sede nacionalista de Carballo para amosar o seu apoio á próxima presidenta da Xunta de Galiza.

"Desde Bergantiños temos o convencemento de que Ana Pontón é a persoa idónea para afrontar o cambio que necesita o noso País, unha presidenta capaz de devolver a esperanza aos galegos e galegas e de liderar o proxecto de futuro que Galiza precisa", explicaron.

Aproveitaron para criticar a proposta de Orzamentos para o ano 2024 para a Costa da Morte, como "un novo exemplo da discriminación á que están sometidos pola Administración autonómica os concellos máis progresistas do País. Un ano máis, o Goberno do PP obvia as grandes necesidades da nosa comarca e do concello locomotora de Bergantiños: nin circunvalación, nin ampliación do polígono industrial, nin ambulancia medicalizada, nin unidade xudicial... Actuacións todas elas imprescindibles para o desenvolvemento económico e social non só de Carballo senón de toda a súa área de influencia".